Dawa u President NPP ban weng ïa u MDC shu sieh

Nongstoiñ, Jylliew, 22: Tang mar shu khyllem noh ka Executive Committee jong ka Khasi Hills Autonomous District Council, ba la ïalam da u bah Titostarwell Chyne kum u CEM u ba dei na ka United Democratic Party bad u bah Pynïaidsingh Syiem na ka National Peoples Party u la sha jied kum u CEM ba thymmai, u bah Winly Thongni u ba bat kum u president jong ka NPP jong ki shiphew shnong kiba hap ha ka Mawshynrut consti-tuency, u la ong ba kum uwei na ki nongïalam jong ka NPP, u dawa ba dei ban weng noh ïa u bah Bindo M.Lanong na ka kam kum u MDC shu sieh bad ban thung noh da uwei pat ha ka jaka jong u.
U bah Thongni u la ong ruh ba baroh shi katta la ju ïohi ba na ki 29 ngut ki MDC ba la jied da ki paitbah ban pyndap laiphew ngut, la hap ban pyndap laiphew da kaba shu sieh da uno uno u rangbah ha kawei na ki shuki ba thylli bad ba dei ban shah jied kum u MDC shu sieh u dei u briew uba don ha ka party kaba don ha ka sorkar. U la ong ruh ba baroh shi katta ki MDC shu sieh ki dei ki briew kiba na ki jaka sor, hynrei na ki jaka kyndong pat ym pat ju don u rangbah u ba shah thung kum u MDC shu sieh.
U bah Thongni u la ong ruh ba ki rangbah na nongkyndong ruh ki dei ban ïoh bynta lem ban shah thung kum u MDC shu sieh, khnang ba ki nongkyndong ruh ki ïa ïoh bynta lem ha ki kam kiba ïadei bad ka roi ka par bad u la ong ruh ba wat lada un shah jied kum u MDC shu sieh ruh u kloi ban shimti.
Ha ka jingshisha hangne ha rilum Khasi bad Jaiñtia ka election ban jied ïa ki MDC ka kham khraw ban ïa ka election ban jied ïa ki MLA namar ba ïa ka District Council la pynkup bor kyrpang ba kan thaw ïa ki aiñ na ka bynta ka khyndew ka shyiap, ka riti ka dustur, ka kheiñ kur kheiñ kha lyngba ka Schedule bad la pynkup bor kyrpang ruh ba kan don la ka jong ka Ïingbishar bad ki Nongbishar kiba peit ïa ki mokotduma kiba ïadei bad ka ki kam khyndew kam shyiap, ka jingpynskhem ïa ki aiñ jong kiba ïthoh shongkurim kiba la mynjur bad ithuh da ka Indian Marriage Act bad ruh ha kaba ïbad ka jingïapyllait sanshyieng jong u tnga bad ka tnga.
Ym lah ruh ban len ba ka jingbym skhem jong ki Executive Committee jong ka KHADC ha man la ki samoi trei kam ka dei namar ba ki paitbah ki jied MDC da ki briew kiba dei ki kruiñ bam duh ïa ka thymmei jong ka jaitbynriew Khasi Pnar. Ki MDC ba ki paitbah ki jied ki long thik kum ki puit tangkuli kynjih mawsiang lane ki panshandi dem lor khah ki bym sngewthuh satia ïa ka dor jong ka riti ka dustur, ka kheiñ kur kheiñ jait bad ïa ka hok longtrai halor ka khyndew ka shyiap.