Shillong, Lber 08 : U nongïalam ka liang pyrshah na ka seng Voice of the People Party (VPP) u Bah Ardent Miller Basaiawmoit ha ka sngi Thohdieng u la pan ka jingpynshai na u Myntri Rangbah ka jylla u Conrad K Sangma halor ka jingkynnoh ba ka sorkar kam shym la ai ka bhah pisa na ka bynta ka Khasi Hills Autonomous District Council (KHADC) kaba hab ruh hapoh ka district budget.
“Kumba ka long hapoh ka jingmang bad bhah ïa ka pisa sha ka KHADC, la pyntip ïa nga ba hapoh ka district budget, ka sorkar jylla ka khlem mang pisa sha ka KHADC halor ka nongrim ba ïa ka pisa la dep ban pynlut naba pynlong ïa ka elekshon MDC hynrei kane kam dei pat ba ka Jaiñtia Hills Autonomous District Council (JHADC),” ong u Bah Basaiawmoit haba ïashim bynta ha ka dorbar mang tyngka.
Na ka liang jong u, u la kyntu ïa u Myntri Rangbah ba un pynshai halor kane ka kam ha ka jingai jubab jong u hapoh ka dorbar mang tyngka.
Lah ban pynkynmaw ba ka VPP ka la thaw ïa ka executive committee ba thymmai ha KHADC hadien ba ka la jop bun ngut ki MDC ha ka elekshon MDC ba dang shu dep ha KHADC da kaba ka la ïoh jingjop haduh 17 ngut ki MDC. Lah ruh ban ong ba ka VPP ka la shong pat ha ka liang pyrshah ha JHADC wat ba ka la jop haduh 8 ngut ki MDC.
