Nongpoh, Naiwieng 4: U Dr. Celestine Lyngdoh Myntri barim bad MLA barim ka Umsning Constituency u la ther tyngeh ïaka sorkar MDA halor ka jingpynslem ban plie noh ïaka Maternity and Child Hospital kaba la dep ban tei bad pynbit pynbiang nadong shadong ha ka shnong Umran Parila ha Ri Bhoi bala shu pynsah shrah haduh mynta, watla kala dei ban plie noh ban ai ka jingshakri sha ki paidbah, khamtam ki longkmie ba kha khyllung.
Kum ban shu pynpaw ba katei ka Hospital la buh mawnongrim da u Dr. Mukul Sangma Myntri Rangbah barim ka jylla ha u snem 2017 kaba don kumba 50 jingthiah bala mang pisa haduh 15 klur.
Haba kren haka jingïalang ban plie ïaka iing Dorbar ha ka shnong Mawtari Myrdon u Dr C Lyngdoh u la ther tyngeh halor ka jingbym shimkhia ka sorkar MDA ban wanrah ïaki kam pynroi kumba ka shnong Mawtari Myrdon mynta u snem kala pdiang ïaka jingiaseng Synod kaba naka liang ka sorkar man ba don synod ka mang kumba 1 klur u surok hynrei kaha sngewsih ka long ba katei ka shnong kam shym la ioh satia ïaki surok (Internal Raods) watla ka synod kala leit noh.
Ha kaba ïadei bad ka MCH Hospital ha Umran Parila naka liang ka sorkar ha ka por ka jingwan lyngshop ka khlam Covid-19 la pynlong ruh kum ka Corona Center bala pynbiang ïa baroh ki tiar ba donkam naduh ka oxygen, ki jaka sah, bad ki tiar sumar, ki Generator hynrei kaba sngewsih ba haduh mynta kane ka sorkar kam pat plie ïa kane ka hospital kaba la donkam eh haka thaiñ ha kaba ïa katei ka jaka sumar la wanrah haka por ba u long kum u MLA jong ka Umsning.
Shuh shuh u la ong ruh ba lada plie noh ïa katei ka Hospital kan long ka jingkyrkhu ïaki paidbah ka thaiñ Ri Bhoi namar kumba long mynta la shu ïa beh beit sha Ganesh Das Hospital ha Lawmali kaba la khapngiah bad kam lah shuh ban pynbiang ïaka jingsumar sha ki paidbah na kylleng ki jaka ban leit kha khyllung.
