Shillong, Jymmang 31: U Director ka Health Services (MI) Dr Aman War, u la dawa ba dei ban pynshitom ïa Indian Institute of Public Health (IIPH) namar ka jingrung jubor sha ka jaka jong ka DHS (MI) ha Pasteur Hills, Lawmali bad ïa u Principal Secretary ka Health , u Sampath Kumar namar ka jingpynkheiñ aiñ jong u.
ïa kane, u Dr. War, u la dawa haba jubab ïa ka show cause notice ba u la ai sha u Commisioner and Secretary ka tnad Health mynta ka sngi, ha kaba u la kyntu ruh ïa u(Commisioner and Secretary) ba un weng noh ïa ka show cause notice ne ka jingpan jingpynshai kaba u la ai ha ka 27 tarik mynta u bnai.
Nalor kane, u DHS(MI) ula pynpaw ïa ka jingbym sngewtynnad ba balei u Principal Secretary ula kheiñ kor bad pynksan ïa ka Director ka IIPH ban ïa u Ophisar bala rangbah jong ka Tnad treikam.
“Sa shisien, nga ban jur ba ka jingjia ba jia ha ka 27 tarik Jymmang ha campus barim ka NIFT ha kaba la kynnoh ba nga laleit bad katto katne ki shynrang bad kyndang ïa ki tiar ki tar bad ki miet ki shuki na ka kamra klas ka dei ka ba shu thaw hi, ba thok bad ba leh da ka jingthmu kaba shai kdar ban pynthohbria ïa nga” ula ong.
Lah ban kdew hangne ba ka Ophis u DHS(MI) kala kyndang ïa ka IIPH na campus barim ka NIFT namar ka jing pyndonkam be-aiñ ïa ki kamra ba ka Ophis kala ai sha ka Meghalaya AIDS Control Society khlem da ïoh jingbit.Kane ka jia ruh hadien ba arngut ki Doktor Kynthei ka Meghalaya AIDS Control Society ba kynthup ïa i Project Director bad Deputy Director kila shah kren tohmet bad shah kren khor ha u Registrar ka IIPH.
Ka jaka jong kane ka campus barim ka NIFT ka dei ka nongkynti jong ka Directorate of Health Service (MI) kaba dei khmih ïa baroh ki Medical Institution ha ka Jylla. “Ym shym la ai mynno mynno ruh sha ka IIPH”, la ong u Dr. War.
Shuh shuh, ula ong ruh, ba u Principal Secretary jong ka sorkar Meghalaya, Health and Family Welfare Department, u la shu shim rai khlem da sngap ne ailad pat ïa u ba shah kynnoh (DHS-MI) ban pynpaw ne ban pynshai na ka liang jong u. Nalorkata ki la leit sha ki lad pathai khubor khlem da wad ne pynshisha ïa kaei kaba jia tang ban ïoh pynthobria ïa u.
