Shillong, Nailur, 20: U MLA ka North Shillong Constituency u Bah Adelbert Nongrum u la pynpaw ïa ka jingsngewkhia ba um shym la ïoh ban ïatai ïa ka mat Roster System hapoh Ïing Dorbar Thawaiñ Synrai, hynrei u la ba watla u la khmih lynti ba kan wan lyngba ka resolution namar ka jinglyngkot ka por kumta u la hap ban wanrah noh da ka Adjournment motion ban ïakren ïa ka Roster System naba ka long ka mat kaba kongsan bad ban duh noh ïa kiwei pat ki mat ba u ladep buh hapoh ka Ïïïingdorbar Thaw Aiñ ba dang shu kut shen.
“U Lamphang ruh u la ailad ïa nga ban wanrah ka Adjournment Motion namar ka long kaba kyrpang namarba ngi la ïohi ba ka la mih ka jingkulmar jingmut jingpyrkhat bad jingbym sngewthuh. Kane ka Roster System ka la mih ruh dei tat haduh ba la mih ka jingujor da ka longkmie Zanera R. Marak na rilum Garo halor ka phang ka jingkiew kyrdan (Promotion) ha kaba ka Ingbishar Meghalaya High Court ka la lap ba ka Sorkar Meghalaya ka khlem pyntreikam ïa ka Roster System bad halor kane ka Ïingbishar ka la bthah ïa ka Sorkar Jylla ban pyntreikam ïa ka Roster System naduh ka por ba la pyntreikam ïa ka bhah thungkam thungjam (Reservation Policy) 1972 bad ka Sorkar Jylla ka khlem ïakhun ïa ka Hukum jong ka Iingbishar,” ong u Bah Adelbert.
U la ong, kaba lyngngoh ka long ba bunsien ka dei ban pyntreikam shakhmat hynrei la bthah ba ka dei ban ïaid shadien ne naduh ba sdang bad hangne la lap ba ka Roster System ka don ar tylli kawei ka dei kaba pyntreikam ha ki post jong ki Head Office kaba 40 la 40 ka bhah thungkam bad kawei ka dei ki Post ha ki District Office.
“Hapoh ka Head Office ki dei ki Post Officer (Gazetted post) bad ha ki district ka treikam biang ka bhah 40 la 40 da kaba buh ka kyntien “Local” ne trai shnong ba pura ha ki Post barit, LDA sharum, kaba la ai bhah biang ïa ki lai jaitbynriew ha kaba ki Garo kiba la long trai shnong ha kano kano ka District ki lah ban thep kam. Ka jingkylli kaba mih ka long hato u Khasi un leit neem ban thep kam sha Garo Hills bad katno ngut ki trai shnong Khasi bad Jaiñtia kin don sha ki district ha rilum Garo,” u la ong.
Haba ai nuksa ïa ki kam kiba noh tarajur, u Bah Nongrum u la ong, “kum ki kam ba pynbna da ka Meghalaya Public Service Commission (MPSC) ha ka 9 tarik, Nailur 2022, na ki 59 tylli ki kam ba la khot, 29 tylli ka leit sha ki Garo, 21 tylli sha ki Khasi- Jaiñtia, kumjuh ruh ka jingpynbna ka MPSC ha 14 Nailur 2022 ïa ki 121 ki Post bad ki don ruh ki Post ba la pynbna da ka Iingbishar Meghalaya High Court ki 12 tylli ki post ha ka 23, Jylliew 2022, ha kaba kine ki jingpynbna ki wan hadien ba la bthah pyntreikam ïa ka Roster System naduh ba la ujor ka longkmie na rilum Garo.”
“Hato kum ki MLA ka long ba ngin shu sngap ne ka dei ban pynbor ïa ka Sorkar ban peitkhmih bad ban pynthymmai ïa ka Roster System namarba ka lawei jong ki khun samla bad kum ki MLA ngin hap jubab ha la ki jong ki Consituency. Sa kawei ka jingpynkyndit ïa ki samla ka dei hadien ba mih kawei ka Hukum jong ka Ingbishar Meghalaya High Court bad kawei ka Office Memorandum ha 10.05.22 kaba ong, ‘Reservation for Post’ kaba ïatyngkhuh pat bad ka Office Memorandum kaba la pynmih ha ka 12.01.1972 kaba ong ‘Reservation on Vacancies,” la ong u Bah Adelbert.
“Nga buh ka jingkylli ïa ki samla bad ïa ki para MLA ba ki dei ban tip kaei ka jingïapher hapdeng ka ‘Post’ bad ‘Vacancies’ kumta nga dawa bad ïai dawa ba ïa ka Roster System dei ban peitkhmih pynthymmai,” u la ong.
“Katkum ka Office Memorandum kaba la pynmih ha ka 10.05.2022 ka jingpyndonkam ïa ka kyntien ‘Local’ ne trai shnong ka mut ïa kito kiba long ki nongshong shnong bapura jong kato ka District kiba lah shwa nyngkong (First Preference to permanent residence) ne plie lad ban thep kam shwa ïa ki trai shnong. Ka jingkylli kaba mih mynta ka long, hato kin don mo ki ban long ki nongshong shnong bapura sha rilum Garo, lehse ki lah ban don khyndiat, haba kumne mano ban ïoh myntoi na kane ka Roster System,” la buh jingkylli une u MLA ka North Shillong Constituency.
