Dawa u Advocate District Court, EJH ban khang noh ïa kawei na ki jaka lum khajna ha Jaiñtia Hills

Khliehriat iaïong 5: U Bah Kynjaimon Amse, Advocate District Court, East Jaiñtia HIlls District, u la phah da ka jingthoh sha u Project Director, Shillong PIU, NHAI Shillong, ha ka ba u la dawa na ka bynta ban khang noh ïa kawei na ki artylli ki jaka lum khajna (Toll gate) ki ba don hapoh Jaiñtia Hills District.
U la pynkynmaw ruh halor ka jingkren jong u Myntri ka sorkar pdeng u ba khmih ïa ka tnat Road Transport bad Highway, u Nitin Gadkari hapoh Lok Sabha ha ka 22 tarik u Lber ba la dep, ha ka ba u la pynpaw ba ym dei ban pynieng ïa ki jaka lum khajna hapoh ka jingjngai ka ba 60 km ha ki surok national highway hapdeng kawei ka toll gate bad kawei pat, ha ka ba u la ong ruh ba lada ki don palat ïa kawei ka toll gate hapoh ka jingjngai ka ba 60 km dei ban khang noh ïa kawei na ki hapoh ka lai bnai.
Khlem da donkam shuh ban pynpaw, kine ki jingkren jong utei u myntri ka sorkar India ïa ka ba la wanrah ruh hapoh ka Parliament dei ïa ka ban burom.
Halor kitei ki mat ba la kdew, une u Advocate u kwah pyntip ruh ïa ka jingshisha ba ha lynter ka surok National Highway-6 kumba ka long mynta ki don artylli ki toll gate hapoh Jaintia Hills, kata kawei ha ka shnong Lumshnong bad kawei pat ha ka shnong Pasyih (Ialong) bad u pyntip ruh ba ka jingjngai hapdeng kine ki artylli ki toll gate ka long tang kumba 53 Km kawei na kawei pat, bad kumta kine toll gate ki dang hap hapoh ka jingjngai kaba 60 km, kata ha ka thup kumba la pynpaw da utei u myntri ka sorkar pdeng.
Nalor kata u la ong ruh ba katkum ka jingtip ka jong u, katkum ki kyndon ki ba iadei bad ka dor lum khajna jong ka National Highways Fee (Determination of Rates and Collection) Rules 2008, ka jingjngai mar shiliang hapdeng ki artylli ki toll gate ka dei ban long kumba 60 Km kata ka ba jan tam, kata ka ba mut ba kam dei ban don palat ïa kawei ka toll gate hapoh ka jingjngai ka ba 60 km ha ka surok National Highway.
Kumta ruh halor kine ki jingshisha, na ka liang u Adcovate u kyntu ïa une u heh ba dei khmih ba un leh ïa ka ba donkam katkum katei ka jingpynpaw jong u myntri ka sorkar pdeng, kata ban khang noh ïa kawei na kine ki toll gate hapoh Jaiñtia Hills District hapoh jong ka 3 bnai.Ka NHAI ka dei ban khang noh ïa ka Ialong (Pasyih) lane ïa ka Lumshnong toll gate hapoh ka 3 bnai.
Shuh shuh u la ong ba ka jinglum khajna da kine ki toll gate hadien ba la kut kitei ki lai bnai kan long ka ba beaiñ bad ka ba long pyrshah ïa ka aiñ bad ka NHAI ka dei ban shim ïa ki sienjam halor kane ka bynta.
Ka jingbteng ban lum khajna ha baroh kine ki artylli ki toll gate hadien ba la kut ki lai bnai yn khmih kum ka kam ka ba khia shibun bad ka ban lam sha ka jingshah ujor lyngba une u Advocate hapoh ka iïngbishar.U la ong ruh ba kane ka dei na ka bynta ka bha ka miat jong ki paidbah bad ba kawei napdeng kine ki toll gate dei ban khang khyrdep noh kloi katba lah.
Halor kane ka bynta la phah ruh ïa ka jingthoh sha u Chief Secretary, ka sorkar Meghalaya, Regional Officer, NHAI Guwahati, Deputy Commissioner, East Jaintia Hills District bad Deputy Commissioner, West Jaintia Hills District