Shillong, Risaw, 23 : U MLA ka TMC na Rajabala u Dr. Mizanur Rahman Kazi u la kyrpad ïa u Myntri Rangbah ka Jylla u Conrad K Sangma phah tohkit kaba khlem ïashah liang halor ki jingkynnoh ba ki don ki jingleh bymsuidniew ha ka por ba don ka jingkhynra ha iew Rajabala ha ka 15 tarik mynta u bnai
Ha ka shithi ba la aiti sha u Sangma ha ka sngi Baar, u Dr Kazi u la ong, “nga kyrpad ïa phi ban thung ïa ka jingtohkit kaba khlem ïa shah liang halor ki jingkynnoh jingleh be-aiñ. Kane ka lah ban kynthup ïa ka jingthaw ïa ka high level committe ban tohkit ïa ki jingjia, ban bishar bniah ïa ki kam jong ki bor pynïaid ka GHADC bad ki sengbhalang kiba donkti lang bad ban pynthikna ba ki kynhun dei ban ïa pynbeit bad ban ïoh ïa ka jingsiew bai lutksan. Da kata ka lynti yn sa lah ban wanrah ïa ka jingshaniah ha ki paidbah nongshong shnong bad ban pynneh ïa ki nongrim jong ka jinglong marryngkat bad ka aiñ kaba ïaryngkat ha Meghalaya.”
U la ong ba kane ka jingkhynra la pynlong da ki bor synshar jong ka Garo Hills Autonomous District Council (GHADC) ryngkat ka jingïatreilang bad ki katto katne ki sengbhalang bad ka la pynmih ruh ïa ki jingkylli shaphang ka rukom treikam kaba hok, kaba khuid, bad ka jingïada ïa ka hok jong ki nongshong shnong.
“Kum u nongmihkhmat ba la jied da ki paidbah jong ka Rajabala, nga la leit jngoh ïa katei ka jaka ha ka 18 tarik, Risaw, 2025 bad nga la ïoh shibun ki jingujor na ki nongshong shnong kiba shah ktah bad na ki paidbah kiba la pynpaw ba ka don ka jingpynkheiñ kyndon ha ka jingkyndang,” u la ong da kaba bynrap ba ïa kine la leh khlem da ai ka jingtip kaba biang bad ka jingpyndonkam da ka bor.”Kum kine ki jingleh, lada ym lah ban pynbeit, kim pynduh tang ïa ka jingshaniah jong ki paidbah ha ki jaka treikam jong ngi hynrei ki don ruh ka jingma ban pynjur ïa ki jingeh ha ka imlang sahlang,” la bynrap u Dr. Kazi.
