Shillong, Nailur 13 : U MLA ka Mawsynram Constituency u bah Himalaya Shangpliang mynta ka sngi u la dawa hapoh ka ïing dorbar ba ka sorkar ka dei ban phah tohkit balei ba kawei ka skul SSA ha Ri Bhoi ka shim baiskul haduh 2500-3000 tyngka shibnai na ki khynnah skul.
U la ong ba kane ka skul ka dei ka skul SSA kaba kyrteng ka Nongrim Byrni Presbyterian Secondary School, Ri Bhoi. U lyngngoh eh ban tip balei ba ka Managing Committee jong kane ka skul ka rai ban shim bai skul ïa ki khynnah skul.
Kane ka dei ka skul sorkar kumta kam dei ban shim bai skul. “ Nga wanrah khnang ïa kane sha ka jingtip u myntri ka tnad pule puthi khnang ba un phah tohkit halor kane” ong u bah Shangpliang.
U la ong ruh ba kane ka skul kam don ki nonghikai ba la biang kyrdan ban hikai ha ki Class IX bad X. “ La phah ïa ki khynnah ba kin shu pule na ki kot ïarap. Ki nonghikai ki wan bad phah beit ba kin pule na ki kot ïarap” ong ubah Shangpliang.
U la kyntu ruh ïa ka sorkar ba kan shim khia ban peit ruh ïa ka jingeh jong ki nongtrei kiba peit ïa ka midday meeal. U la ong ba ym pat ju ïohsngew ba kine ruh kin hap ban mih surok ban ïakhih.
U la kyntu ruh ban pyntreikam ïaki jingdawa jongki namar haduh mynta ki hap shet da ka dieng, balei ym pynbiang ïa ki da ka LPG Gas ong u bah SHangpliang. U la kyntu ruh ïaka sorkar ba kan thung kam ïa baroh kito ki nonghikai kontrak kiba la pass ïa ka eksamin MTET.
