Shillong, Lber 30 : Ka Nangrimingin Achik Dol (NAD) ka la pynrem jur ïa ki jingkynnoh thombor bad pyni bor jong ki nong Bangladesh kiba wan rung tuh sha ri-lum Garo bad dawa ba dei ban beh krad mardor, pyrkhing ïa ka rung ka mih ha khappud bad ban tohkit ka NIA ïa ka jingkulmar ba dang shen.
“Ngi dawa ïa ka jingtohkit kaba bniah bad bym shah liang halor ki kam bymman jong ki nong Bangladesh ba rung tuh bad ka jingdon bynta jong ki ha ka ban pynshit ïa ka jingïakynad pher jaidbynriew, ban beh krad syndon ïa baroh ki nongbuhai shnong beaiñ kiba shong basah ha ki jaka ki riewlum ha ri-lum Garo, kaba la ïoh hukum na ka GHADC, pynkhlaiñ ïa ka jingpahara ha khappud bad ban pyntreikam pyrkhing bha ïa ki aiñ kiba khang ia ka jingrung tuh nalor ban ïada ïa ka hok ki riewlum trai ri trai muluk hapoh ka Sixth Schedule” ong u nongaiktien ka NAD u Francis Marak haba ïakren bad ki nongthoh khubor ha ka sngi Nyngkong.
Ka NAD ka ong ba ka jingpyniap ïa u Dalseng M Sangma, ka POCSO case bad ka jingkynnoh leh beijot kynhun ha Chibinang ki dei ki nuksa ba donkam ban tohkit da ka NIA bad ka dawa ban tohkit ïa ki mosque, ki jingtih par ha North West bad South West Garo Hills bad ban siew bai lutksan sha ki bahaïing hasem u Sangma.
“Ngi dawa ïa ka jingtohkit NIA halor ka jingpyniap ïa u Dalseng M Sangma bad ka POCSO Case ba la leh da ki nong Bangladesh ha Chibinang bad ka jingleh beijot kynhun ha ka thaiñ Chibinang ha kaba kawei ka kynthei ka la sah leh beijot ha ki 5 ngut ki nong Bangladesh ba wan rung tuh, kiba la thombor ïa ka baroh shimiet bad ha ka step ba bud, la pynïaid lyngkhuid ïa ka ha ïew. Ka jingtohkit ka NIA ka donkam ruh ïa baroh ki mosque ha ri-lum Garo, ban khang ïa ka jingtih par maw beaiñ ha NWGH bad SWGH bad ban pyntreikam ïa ka NGT” ong u Marak haba dawa ba dei ban sdien phasi ïa ki briew kiba pyniap ia u Dalseng.
“Ngi dawa ïa ka Sorkar Jylla, ka Sorkar Pdeng, bad baroh ki bor khmih ba don bynta ba kin shim khia bad ban bat ïa ka hok, nalor ban pynthikna ba ym dei ban ïapeiñ ïa ka hok bad ka burom jong ki jaidbynriew trai muluk” ula bynrap.
