Tura, Lber 25 : Ka Garoland State Movement Committee (GSMC) ryngkat bad ki seng bhalang bapher bapher ha ri lum Garo ki dawa ba ka sorkar ka dei ban thung da ka jingtohkit Majistor ïa ka jingkhleiñ sting u Headmaster ka Rengsinpara Secondary School u Suresh Newar bad u nongtrei ka skul u Vijoy Chettry namar dei ka jingkheiñ sting jongki ba ki 15 ngut ki khynnah skul kiba pule ha kane ka skul ki duh ban ïaleh ïaka eksamin phainal jongka SSLC kaba sdang ha ka 24 tarik mynta u bnai.
Kine ki 15 ngut ki khynnah skul jong katei ka skul ki khlem ïoh ban thoh eksamin ha ka 24 tarik Lber 2022 na ka daw ba kim shym la ïoh ïa ki Admit Card. Kiba pli hadien ba la dep pule haduh 12 snem tang na ka daw ka jingkheiñ sting u Headmaster bad utei u nongtrei ka skul hapdeng ka shiminit ki la duh ban ïaleh ïa ka eksamin phainal. Kane ka long ka jingpynkheiñ ïa ka Right to Education Act ong ki seng bhalang.
Ka long kaei kaei kaba pynkthang mynsiem ïa kine ki 15 ngut ki khynnah skul bad ïa ki kmie ki kpa jongki. Ym tip shuh shano ka lawei jongki kan poi namar ban duh shisnem kam long kaba kai bad kumta ki bor sorkar ki dei ban ai ka jingpynshitom ïa utei u headmaster ba utei u nongtrei jongka skul.
Ha kajuh ka por ki seng bhalang ki dawa ruh na ki bor pynïaid ka MBOSE ba kin thaw lad ïa kiba pli kine ki khynnah skul ba kin ïoh ban thoh ïa ka eksamin phainal jongki. “ Ngi kyntu ïaka sorkar khamtam ïa u myntri ka tnad pule puthi ba un shim khia ïa kane bad thaw lad kumno ba kine ki 15 ngut ki khynnah skul kin ïoh ban pyndep ïa ka eksamin phainal jongki.
