Tura, Jymmang 11 : Ka Garo Student Union (GSU) Siju Unit ka la ai da ka jingthoh sha u Deputy Commissioner jongka South Garo Hills ha kaba la dawa ban phah tohkit halor ka jingsahteng bad sah khongreng ban tei ïa ka Model School kaba ha Siju, South Garo Hills.
Kat kum ka RTE 2009 la kren shai ba ki khynnah ki don ka hok ban ïoh ïa ka jingnang jingstad bad ka jinghikai ruh ka dei ban long Pupil Teacher Ratio (PTR) khnang ba ki nonghikai ruh kin ym khia bad ba ki khynnah ruh kin ïoh jinghikai bha.
ïa kane ka Model School ha Siju la bei da ka Ministry of Human Resource Development lyngba ka skhim Rashtriya Madhyamik Shiksha Abhyan (RMSA) naduh u snem 2012-13 hynrei haduh mynta u 2022 ruh ym pat lah ban pyndep ïa ka jingtei ïa kane ka skul. Kane ka la buh ïaki khynnah skul jongka Siju ha ka jingeh namar haduh mynta kim ïoh ban pule ha kane ka skul tang na ka daw ka jingkheiñ sting jongu kontraktor.
Ka GSU Siju Unit ka ngeit skhem ba kane ka skul kan long ka jingkhring ïa ki khynnah ban wan skul lada lah ban pyndep kloi ïa ka. Kumta khnang ba kan long ka jingmyntoi ïaki khynnah skul ka GSU ka dawa na u DC ban tohkit bniah halor kane ka jingpynslem ban pyndep ïa kane ka skul.
