Tura, Jymmang 4 : Ka Central Executive Committee (CEC) jongka Garo Student Union (GSU) ka pynpaw ka jingsngewsih bad sngew pyrshah jur halor ka jingñiew shilliang khmat bad pynsah ïa ki Nongialehkai jongka Meghalaya Games 2022 kiba na Garo Hills ha ki jaka ba jakhlia tam bad halor kane ka dawa ba ka sorkar ka dei ban thung da ka jingtohkit bad pynshitom ïa ki briew kiba donkti ban jied ïa kum kine ki jaka kat kum ka ain.
“ Ka la long ka jingkyndit kaba khraw haba la ïohi ïa kane ka jingleh shilliang khmat bad jingbym burom ïa ki Nongialehkai Meghalaya Games kiba long ki samla, bad nuksa ïa ka jingkoit jingkhiah bad ïa ki nongïalehkai sport ha ki jingïalehkai bapher bapher. Kane ka la long kum ka jingthmu ban wanrah ïa ka jingsngew ïapher jaidbynriew bad kumjuh ruh ka jingthmu ban pynduh mynsiem ïa ki ha kane ka jingialehkai Meghalaya Games” ong ka GSU.
Ka GSU ka buh ka jingkylli mano ba shim rai ban jied ïa kine ki jaka na ka bynta ki nongïalehkai bad shano kita ki ophisar ka tnad ki don ban peit ïa baroh ki nongialehkai namar ki jaka ba la buh ba kin sah naduh ki kamra haduh ki paiñkhana ki long kiba jakhlia bad isaitmet haduh katta katta wat ban pyndonkam ruh ym don ba nud.
Haba la pynlut da ki klur tyngka ban pynlong ia kata ka Meghalaya Games hynrei la pynsah pat ïa ki nongïalehkai ha kum kitei ki jaka ha kaba wat ki mrad ruh ym tharai shuh kin dang treh ban thiah ban dem. Kumta ka GSU ka dawa ba dei ban thung da ka jingtohkit bad pynshitom kat kum ka aiñ ïa ki ophisar bad ïa ki briew kiba donkti ban jied ïa kum kane ka jaka, pynkut ka kyrwoh na u Zikku Balgra N Marak, President ka GSU Seng Kmie.
