Shillong, Naitung, 14: Ka Federation of Khasi Jaiñtia and Garo People (FKJGP) Central Body ha ka sngi Palei ka la dawa ïa ka Sorkar Jylla ban siew bailut ksan ïa kiba la mynsaw ha ka jingkhyllem ka jaka shong peit kai phutbol ba la shna rynsan tang da kaba shu teh da ki siej ha Third Ground, Polo.
Ka jaka shong peit kai phutbol ka la khyllem katba ka jingïalehkai ha ka kylla step hapdeng ka Mawlai Sports Club bad ka Ryntih Football Club ka ka dang ïaid shakhmat ha ka lympung ïalehkai OC Blue Shillong Premier League 2021-22 ba la pynlong da ka Shillong Sports Association (SSA).
“Ha ka jingsynshar jong ka Sorkar MDA mynta ngi shu ïohi beit tang ki jingkhyllem. Ki jingkieng ruh ki khyllem, ki surok ruh ki twa, ka tnum jong ka Assembly ba thymmai ruh ka khyllem bad sa mynta ka sngi ka jaka shong peitkai phutbol ki paidbah ha Polo ruh ka la khyllem,” ong u Vice President ka FKJGP u Bah Kitboklang Nongphlang haba ïakren bad u Mawphor lyngba ka telephone.
“Ngi ïohi ba ka tnat Sports and Youth Affairs jong ka Sorkar ka la phiel namarba ka jingpynlong ïa ka Meghalaya Games ha kine ki khyndiat bnai ka la phiel. Ki jingdkoh suda ha kiba bun ki liang. Ngi suba ba ka don ka jyrsieh bamsap kaba jur,” la kynnoh une u nongïalam ka FKJGP.
Ngi pynrem jur ïa kane ka jingbym shimkhia jong ka Sorkar bad ka tnat Sports and Youth Affairs ka dei ban siew bai lutksan ïa kiba mynsaw ha ka jingkhyllem ka jaka peit kai phutbol ha Polo mynta ka sngi, u la ong.
Ula ong ba la donkam ban tohkit ïa kane ka jingjia namarba ka jingkhyllem jong kane ka jaka peit kai ka dei kaba la bei pisa da ka tnat Sports and Youth Affairs jong ka Sorkar Jylla sha ka Shillong Sports Association (SSA). “Ngam tharai ba ka SSA kan pynlut pisa haduh katto katto ban shna ïa ka jaka peitkai jong ki paidbah,” u la ong.
