Shillong, Naitung, 19: Ka seng Hynniewtrep Youth Council (HYC) ha ka 19 tarik Naitung ka la phah da ka sha u Cabinet Secretary ka sorkar pdeng ban dawa phah ban aiti ha ka Crime Bureau Investigation (CBI) halor ka jingtorti ban pyntrei ïa ka skhim Saubhagya Scheme hapoh Meghalaya.
Ka HYC lyngba ka shithi sha u Cabinet Secretary ka sorkar India ka kynnoh ba ka jingpyntrei ïa kane ka skhim Saubhagya hapoh jylla ka la long kaba torti khamtam haba ïadei bad ka jingbhah kam sha ki contractor bapher bapher.
Ha kane ka shithi ka pynpynmaw ba ka sorkar jylla lyngba ka Meghalaya Power Distribution Corporation Limited (MePDCL) kala pynkhreh da ka DPR naka bynta ka rilum Khasi–Jaintia bad Garo ha kaba la antad ba ka jinglut kan poi kumba 508.48 klur.
“Ka MePDCL kala ïaid lait ïa ka jingbthah ka ophis Cabinet Secretary ka sorkar India namar ki artylli ki kompeni ba ïoh pyntrei ïa kane ka skhim ki ïoh haka dor 50 bad 54 persen kham heh ïa ka dor bala buh haka por khot tender haka ba ka kompeni M/s Satnam Global Infraprojects Ltd kala ïoh ïa ka kam haka dor T. 173.60 klur bad ka M/s Onycon Enterprises haka dor T. 179 klur” ong ka ka shithi ka HYC.
Ka seng ka la kam ruh ba kat kum ka kaiphot jong ka CAG ka pyni ba ka jingpyntrei ïa ka skhim Saubhagya Scheme hapoh Meghalaya kam ïahap katkum ka jingpynlut ïa ka pisa bad dei namar kane ka seng ka dawa baka sorkar pdeng kadei ban phah daka CBI ban tih bniah shuh shuh ïa ki kynrum kynram khamtam haba ïadei bad ki kam bamsap haba pyntrei ïa kane ka skhim.
“Watla ka sorkar Meghalaya haka 30 tarik Jylliew 2021 kala thung daka kynhun tohkit laitluid halor ka kynrum kynram ka MeECL hynrei kane ka kynhun tohkit kam shym la don bynta ban tohkit halor ki kam bamsap haba ïadei bad ka jingpyn trei ïaka skhim Saubhagya” la ong ka shithi ka HYC.
Ka HYC ka kyntu ïa ka ophis u Cabinet Secretary ka sorkar India ban bthah ïa ka sorkar Meghalaya ban ai ka jingmynjur ïa ka sorkar jylla ban wan tohkit daka CBI namar kane ka Saubhagya Scheme kadei ka skhim bala bei tyngka da ka sorkar pdeng na ka bynta ka jingmyntoi ki paidbah ka jylla Meghalaya bad hapoh ka ri India baroh kawei.
