Shillong, Naitung 15: Ki barikor ba trei hapoh jong ka MeECL hapoh ka shatri jong ka Association Of Power Engineers MeECL, Meghalaya ki la dawa ba dei ban pynlong ïa ka jingtohkit halor ka jingbym lah pynmih bording ka tnad kumba ka dei hok ban pynmih bad ban lap mano kiba donkti halor kane ka kam.
Haba kren sha ki lad pathai khubor hadien ka jingïalang ka General Body Meeting, u President jong ka, u Bah Arju Dkhar u la ïathuh ba ki barikor ki dawa ba dei ban don ka jingtohkit ban lap ïa ki daw bad mano ba donkti halor ka jingbym lah ka MeECL ban pynmih bording kat kum ka bor kaba ka don.
“Ngi don ka jinglah ban pynmih bording kumba 350 Megawatts ha ki aiom lyiur ba heh slap tangba balei pat ngi lah ban pynmih tang kumba 30 haduh 50%. Ki don ki Power Station kiba dang thymmai hynrei balei ki duh nyngkong pynban ban ïa kito kiba la shna kham slem bad kaei ka daw ba ki duh namar da ki bun bun klur la pynlut pisa ban thied ïa kor ki bor ha kine ki power station” ong Bah Arju
“Dei na kata ka daw ngi kwah ban don ka jingtohkit ban lap mano ba donkti la ki briew jong ngi ne ki heh jong ka MeECL bad dei ban pynshitom tyngeh ïa kito kiba lum spah shimet da kaba bam kruiñ pat ïa ka tnad” bynrap shuh shuh u Bah Arju.
Shuh shuh u Bah Arju u la ong ba ka General Body Meeting ka dawa ba ka MeECL kam dei ban shu shimram khlem jingkheiñ ha ka kyrteng ban pynbha pynkhlaiñ ïa ka Distribution, Generaration, bad ka Transmission namar kane kan buh jingeh hi hadien habud ïa ka tnad.
U Bah Arju u ong ruh “ka ka General Body jong ka seng ka dawa ba ka dei ban don noh ka Information Technology(IT) kaba pura ka tnad kan lah ban treikam laitluid bad ban long ruh kum ka jinghikai ïa ki barikor ba la kumno kumno ha lane shuwa ka 1 tarik Ïaiong 2025 ngin don la ka jong ka rukom siew bording(billing system)”
Shuh shuh Bah Arju u la ong ba da ki bun bun klur la aiwai na bynta kane ka kam, katba lada ka IT Team jong ka tnad hi ka pan pisa na bynta ban pynjanai ïa ka rukom treikam ka daw kaba ki ai ka long beit bynm don pisa ïathuh u Bah Arju
“Ngi don kyrhai ki barikor kiba lah ban leh ïa kane ka kam namar ngi la don la ka jong ka rukom siew bai bording kaba la tip kum ka ELVIS, ha ka jaka ba phin kyrshan ïa ki ba kin lah ban pynjanai ïa kane ka tnad balei pat ki sngew tynnad ban ai wai sha ki kompeni kiba shabar” buh jingkylli u Bah Arju.
U Bah Arju u la ong ruh ba ka kynhun ki don jingthmu ban ujor da ka ejahar pyrshah ïa ki bor pynïaid ka MeECL halor ka jingbym lah jong ka ban thung nongtrei. U la ong ruh ba kane ka jingbym don nongtrei kumba dei ban don ka buh jingeh ban ai jingshakri kaba paka bad ruh ka iuhroit ïa ki kyndon jong ka UN bad ki kynta trei.
Haba kren halor ka jingshah bat bording ba khah khah khamtam eh khynnah ki khunlung u Bah Arju u ong ba ka dei namar jingbym don ki jingker kiba paka ïa ki transformer namar ka sorkar kam ju mang pisa satia ban ker ïa ki ha ki por ba mang pisa na bynta ban buh Transormer.
“Ngi bha palat kum ki nongshong ka jylla bad lada kum kiwei kiwei ki jylla ka jia kum kato ka jingshah bat bording haduh 6 ngut ha Lyniong ki la hap ban thung kam ïa ki ba ha iing kito ki lanot katba ha ngi pat ngi hun tang ka bai lut ksan ba lai” ong u Bah Arju
