Dawa thung Inquiry Commission ka KHNAM ba leh donbor ki BSF ïa ki paidbah ha Umsyiem

Shillong, Jylliew 26: Ka Khun Hynniewtrep National Awakening Movement (KHNAM) ka la dawa ïa ka Sorkar Jylla ba kan thung da ka jingtohkit halor ki jingleh donbor jong ki shipai Border Security Force (BSF) katkum ka “Commissions of Inquiry Central Act” bad ruh ban weng noh ïa ki shipai BSF na ki jaka paidbah bad ban pynthikna ba kin don tang ha u Zero line jong ka khappud jong ka ri.
“Ka jingjia ha Lad Umsyiem ha kaba ki shipai BSF ki la bom lathi bad pynmynsaw ïa ki paidbah wat haduh ban da siat kuli ha ka 25 tarik u Jylliew 2023 kam dei shuh ka sien ka banyngkong ha kaba ngi la sakhi ïa ka jingleh donbor jong ki BSF. Dang ha ki khyndiat sngi la don ki riew paidbah ba la shah siat ïap ha ki shipai BSF. Lada ka Sorkar Jylla kan dang ïai leh jem halor ka jingleh donbor jong ki shipai BSF kin dang don ki ban dang duh ei ïa la ka jingim,” ong u kyrwoh ba la phah da u Working President ka KHNAM u Bah Thomas Passah.
“Ka dei ka kamram jong ka Sorkar Jylla ban peit ïa ka shongsuk shongsaiñ ha ka jylla bad ki shipai BSF kim lah ban tam ïa u pud lane ban knieh ïa ka iktiar jong ka Sorkar Jylla. Kane ka jingleh jong ki shipai BSF ka pynpaw ïa ka jingbymkhieñ snep jong ki ïa ka ikitar jong ki bor synshar district bad ïa ka Sorkar Jylla bad ka long kaba beaiñ, bad ka Sorkar Jylla ka dei ban mudui da ka ejahar pyrshah ïa ki shipai BSF katkum ka Section 147, 148, 323, 353, 427 jong ka Indian Penal Code (IPC),” la bynrap u kyrwoh.
“Ha ka 10 tarik, Naitung, 1987 ka Sorkar Jylla ka la thung da ka Inquiry Commission halor ka jingpynklumar bad ka jingbom lathi bad ka jingsiat pathar jong ki shipai BSF ha Baghmara. Te lada ka don ka jingthombor da ki shipai BSF ha ki thaiñ Khasi ruh ka Sorkar ka dei ban shim ïa ki juh ki sienjam ym ban leh shilliang,” la dawa ka KHNAM.