Dawa shna pynbha ïaka District Library bad Auditorium Hall ha Jowai bad buh sa kawei ha East Jaiñtia : JSU
Jowai, Jylliew 06: Ka Jaiñtia Student Union (JSU) seng kmie mynta ka sngi ka leit ban kynduh ïa u Myntri ba dei khmih ïaka Art and Culture jong ka sorkar jylla u bah Sanbor Shullai, ha kaba ka seng ka lah ai daka dorkhas ban dawa na ka sorkar jylla lyngba ka tnat Art and Culture ba ka dei ban shna pynbha noh ïaka District Library bad ka Auditorium Hall kaba don ha Jowai.
La pynsngew ba katei ka Hall ka lah sniew lut haki liang baroh naduh ka rong haduh ka jaka shong bad haduh ki kynroh ïing bad ki light shapoh ka Hall bad ka seng ka dawa ban shna pynbha noh kumba leh ïaka District Library cum Auditorium ha Tura, na ka liang u myntri u la kular ban shim khia ban pynbha ïakatei ka Hall kat kum ka jingdawa ka seng.
Ha ka juh ka por ka JSU ka la dawa ruh na ka sorkar lyngba u myntri ka tnat Art and Culture ban buh sa kawei ka District Library bad Auditorium Hall ha East Jaiñtia Hills lane ha Khliehriat namar haduh mynta ki paitbah bad ki tnat sorkar bapher bapher ki shem jingeh ban ïoh ïaka hall kaba biang paka ban pynlong jingïalang bad ki khynnah pule ka thaiñ kin ïoh jingmyntoi na ka Library.
Ka seng ka la dawa ruh na u myntri ban plie paitbah noh ïaka Amphitheatre lane ka jaka pynlong tamasa ne rynsan paitbah bapher bapher kaba don ha Police Reserve Saliny Colony Mihmyntdu-Jowai bad kane ka jaka kadei kaba la dep ban shna la slem ki por hynrei ka seng ka la ong ba na ka liang ki bor ba dei peit kim pat lah ban plie paitbah ban ïoh pyndonkam ki paitbah. Da kaba ïathuh mynta katei ka jaka ka la kylla long pynban ka ïing jah bad bun rukom ki jingsniew ki mih na katei ka jaka.
Halor kitei ki jingdawa u myntri ula ïoh ban ïakren bad u incharge ka District Library Jowai bad ula bthah ban leh ïakaba don kam lada biang ka fund kumba long ka Tura DLA bad u la pyntip ba un sa leit peit hi ïa kane ka jaka Amphitheatre kaba kylla ïing jah bad ban plie noh ïa ka bad ula kular ruh ban buh noh sa u wei u Mot sah nam u Woh Kiang Nangbah ha Lad College lada ïoh jaka na ka tnat Transport kumba dawa ka seng JSU.