Shillong, Jylliew, 10: Ka President jong ka Meghalaya Pradesh Mahila Congress (MPMC ) Kong Joplyn S. Shylla ka la dawa ïa ka jingpan map na ki lad pathai khubor na ri thor kiba la pynjah burom ïa ka imlang sahlang bad ïa ka jylla Meghalaya baroh kawei halor ka jingshah pynïap u Raja Raguvanshi ha Sohra.
Ka Meghalaya Pradesh Mahila Congress ka pynpaw ïa ka jingsngewkhia kaba khraw halor ka rukom pyni khubor kaba la shu pynmih da ki katto katne ki lad pathai khubor kiba na ri thor halor ka jingshah pynïap u Raja Raguvanshi. Ka rukom thoh khubor kaba pynjah burom, kaba khlem da pynshisha, ka la ktah jur ïa ka burom jong ka jylla bad ki paidbah ka jylla Meghalaya.
Ka MPMC ka kyntait ïa kum kane ka rukom ai khubor da ki lad pathai khubor kiba khlem bishar bniah bad lum ïa ka jingshisha ha shwa ban pyn mih ïa ki khubor bad ka dawa ba ki dei ban pan map na ki paidbah jong ka jylla Meghalaya namar ka jingshah pynjah burom ha ka pyrthei baroh kawei da ki lad pathai khubor jong ka Ri thor ka lah ktah jur bad pynsngewsih ïa ki nong shong shnong jong ka Jylla Meghalaya, ong u kyrwoh.
Ka President ka ong ba ka lad pathai khubor ka dei ban treikam da ka jingkitkhlieh, ka jingshisha bad ka jingwad bniah ha ka imlang sahlang. Ka jingshisha ka dei ka nongrim jong ka jingthoh khubor bad lada ki lad pathai khubor kim lah ban bat ïa kane ka jingkitkhlieh, ka long kaba sngewsih bad kaba ym sngewtynnad. Ïa kum kine ki lad pathai khubor dei ban pynshitom da ki bor ba dei peit ïa ki.
Ka MPMC ka kyntu ruh ïa ka Press Council of India (PCI) bad ki tnat kiba peit ïa ka jinglong ryntih ki lad pathai khubor ba kin shimkhia bad leh eiei halor kane ka jingjia.
