Nongpoh, Jylliew 14: Ka Umroi Constituency People’s Forum mynta ka sngi kala mih shakhmat ban dawa syndon da ka lynti ïaid kjat (Footpath) ha rud surok Shillong Bye-Pass naka National Highway Authority of India bad kumjuh ruh ka sorkar jylla, namar ka jingsngewkhia kaba jur halor ka jinglong jingman jong utei u surok bad jur ruh ka aksiden kali kaba la wanrah ruh shibun ka jingduh noh ki mynsiem briew naka por shaka por.
Naka liang ki nongïalam jong katei ka Forum mynta ka sngi kila pynlong ruh ka jingjurip ïa utei u surok bad bun naki paidbah kila pynpaw ruh bala donkam da ka lynti ïaid kjat ban shngaiñ ka leit ka wan jong ki paidbah namar ka jingjia ba shyrkhei bad ki jingïap briew ba man ka por ha utei u surok naka jingïa tyngkhuh kali khamtam haka por slap, ha kaba naka liang katei ka Forum kala pynpaw bala donkam da ka lynti ïaid kjat naduh Lad Umroi haduh Bhoirymbong.
Haba kren sha ki lad pathai khubor, u Bah Gill Warjri President ka UCPF, u la pynpaw ba kum ka kynhun ka dap da ka jingsngewkhia ban iohi ba katei ka surok kam long kaba shngaiñ ïaki paidbah kiba ïaid ba ieng bad ba leit ba wan bala sakhi ruh shibun tylli ki jingjia aksiden naka por shaka por.
Kila kynthoh ruh ba ki bor ka NHAI kim shym la peit bñiah halor ka jingdonkam ka jingshngaiñ ka leit ka wan ki paidbah khamtam ki khynnah skul kiba ju ïaid lynti man ka sngi haba ki tei ïa utei u surok naduh ba sdang.
Namarkata naka liang ka UCPF kala pynpaw ba ka lynti ïaid kjat ka long kaba kongsan ha utei u surok bad dawa ruh naka sorkar bad kumjuh ruh ka NHAI ba dei ban shna noh mardor da ka lynti ïaid kjat naka bynta ka jingshngaiñ jong ki paidbah haka leit ka wan.
