Dawa ki Sengbhalang ban pynsangeh ka sorkar ia ka jingkhaïi dewïong beaiñ na Garo sha Assam

Tura, Lber 30 : Ki Seng Bhalang na ri lum Garo ba kynthup ïa ka A’chik Indigenous Justice Initiative (AIJIF) bad ka Dainadubi Circle Youth Organisation (DCUO) ki dawa ba ka sorkar ka dei ban pynsangeh noh mardor ïa ka jingkhaïi dewiong na South Garo Hills bad North Garo Hills sha Goalpara jong ka Assam da kaba ki trok ki ïaid lyngba ka Dainadubi, North Garo Hills.
Ha ka shithi kaba la phah sa u Deputy Commissioner u Ripseng Marak ha ka 27 tarik mynta u bnai kine ki seng ki pynpaw ba man la ka miet ym duna ïa ka 100 haduh 250 tylli ki trok kit dewiong beaiñ kiba ïaid na ri lum Garo sha Assam.
Wat la ki khyrdop ban talasi ki don hynrei namar ba ki nongniah trok ki la siew peit da ka pisa hapdeng ka 96,000 haduh 1,20,000 shitrok kumta ym don ba kem ne bat ïa ki. La kynnoh ba kane ka pisa ka rung ruh sha ki pla jong kita ki briew kiba kam ba ki dei ki riewsaiñ pyrthei.
Ki la kynnoh ba kane ka long ka kam beaiñ namar ïa kane ka kam la pynïaid iew ruh da ki briew kiba don ka bor bad pisa. “ Ka pisa ka la synshar bad ki nongsynshar ki la matlah namar la tap lup ïa ki da ka pisa. Ki trok ki ïaid katba mon hynrei kane ka jingleh ka ktah ïa ka khajna jongka sorkar. Wat ki riew sorkar ruh ki don kiba ïadon bynta lang ha kane ka kam beaiñ” kynnoh ki ar seng.
La kynnoh ba kine ki trok wei ba ki la mih na South Garo Hills ki mih beit da ka kynhun kim ju ïaid tang iwei ne ar trok bad ki ïaid beit sha Dudhnoi, Krishnai bad Goalpara District. Kine ki trok ki leit pynhap beit ïa u dewiong sha ki jaka lum tup ha Dudhnoi bad Krishnai bad kitei ki jaka lum thup kim duna ïa ka 25 tylli bad kawei kawei ka jaka ka ngiam ban lum thup haduh 1,0000 ton u dewiong.
La pynpaw ba dang shen ka ïing bishar Supreme Court kaba kynthup ïa u Justice Al Sikri bad Abdul Nazeer ka la kyntait ban shah khaïi dewiong ha Meghalaya bad ka la bthah ruh ïa ka sorkar jylla ban khanglad ïa kane ka jingkhaïi dewiong beaiñ kaba la khang ruh da ka NGT naduh u 2014.
Kumta kine ki seng ki kyntu jur ïa u myntri rangbah ka jylla u Conrad K Sangma ban shim khia ïa kane ka kam bad bthah ïa ki bor synshar district ban pyrkhing bad kem ïa kine ki trok bad kurup ruh ïa u dewiong ba khaïi beaiñ kumba la sdang ban leh sha kiwei ki district.