Dawa ki Seng Bhalang na ri lum Garo ban phah tohkit halor ka jingiap ka samla pule ha Shillong Polytechnic
![](https://mawphor.com/wp-content/uploads/2024/07/seng-garo-met-DC-EKH.jpg.jpg)
Shillong Naitung 23: Ki Sengbhalang ka Ri-lum Garo, ba kynthup ïa ka ADE, FKJGP, GSU, AYWO bad ka FAF ha ka sngi Baar ki la leit ïa kynduh ïa ka Deputy Commissioner (DC) ka East Khasi Hills I kong R.M Kurbah ban dawa ba dei ban phah tohkit bniah halor ka jingiap jong ka Diana Dimre Ch Marak, ka samla pule ha Shillong Polytechnic ha u bnai Jymmang 2024.
Kitei ki seng bhalang ki la leit ai lang ïa ka dorkhas sha ka DC bad kyrpad ba kan tuklar lem halor ka jingbym sngewhun ïa ka rukom tohkit kumba la pynpaw da ki bahaïing ba hasem jong katei ka samla kaba la khlad noh.
Ka Diana Dimre Ch Marak 24 snem ka rta, ka dang pule ïa ka Diploma ha ka Civil Engineering ha Shillong Polytechnic bad ka dang pule ha ka 4th Semester. La lap ïa ka met iap jongka ba ka la sahkut hapoh ka hostel jong ki khynnah kynthei jong katei ka jaka pule, ha ka rukom long kaba ipher bha ha ka 6 tarik u Jymmang ha ka por kumba 3 baje mynstep.
“Ki bahaïing bahasem jong kane ka samla kaba la khlad noh kila kyrpad ban ïakynduh ïa ngi bad haka jingïakynduh ki la pynsngew ïa shibun kiei kiei sha ka jingtip jong ngi, kaba khlem ïahap bad ka khana jong ka rukom iap jong ka samla Dianala namar kynnoh bad ka dei ka jingjia jong ka jingpyniap ïalade hi jongka,” la ong ha ka dorkhas.
“Ngi ki sengbhalang na ka rilum Garo, ngi kyrpad ïa phi ba phin shim ïa kane ka kam namar kum kine ki jingjia la ju ïohsngew mynshwa ha kajuh ka jaka pule bad kum kine ki jingjia ba sngewsih ym dei ban shim sting namar ka lah ban wanrah ïa ka jingduh mynsiem kiba kham bun” la pynpaw ki sengbhalang ha ka dorkhas bad ka bynrap “Haba ngi ong kumta, ngi kwah ban pynshai ba ngim shym la thaw ne kynnoh pyrshah ïa uno uno u briew bad ngim shym la kynnoh ruh ïano ïano uba la leh ïa kano kano ka kam runar. Hynrei ngi ïeng haka nongrim ba dei ban ai ïa ka hok sha katei samla kaba la khlad bad sha ki bahaïing bahasem jongka bad ka rukom treikam ka dei ban ïaid ha kata ka rukom ba ka jingtohkit kam dei ban don kano kano ka jingleh ne jingnoh shilliang.”
Kumta ki la ujor da ka ejahar pyrshah ïa ka jingkynnoh ba ka Diana kala pynïap hi ïalade lyngba ka Zero FIR ha Tura Sadar PS ha ka 16 tarik u Jymmang.
Shuh shuh kila phah ruh ïa ka shithi sha u SP, East Khasi Hills lyngba u Chairman ka Babupara Chambugong Mahari Association.
“Ka long ruh kaba donkam ban shimkhia ba ïa ka kaiphod jongka Post Mortem namar ym shym la aiti sha kiba haïing hasem jong katei ka nongïap haduh katto katne por, la palat ar taiew, watla ki bahaïing bahasem kila pan bunsien ïa ka kaiphod jongka PM bad watla ka kaiphod jong ka PM la pynkut ha ka sngi ba jia hi ha ka 6 tarik u Jymmang. Hynrei tad ynda la ujor ïa ka Zero FIR ha ka 16 tarik u Jymmang bad la thoh da ka shithi sha u SP ka East Khasi Hills ba ïa ka kaiphod jong ka PM la aiti sha ki bahaïing bahasem jong kaba la khlad noh,” bad ka bynrap
“Ki Kur kim sngewhun ïa ka ka kaiphod jongka PM namar u nongpeit bniah ïa ka daw jong ka jingiap jong ka Diana ula pynkut ba kadei ka jingsdien phasi, hynrei u doktor uba la pynlong ïa ka jingpeit bniah um shym la phah ïa kino kino ki nuksa na ka bynta ka Histopathology bad ki nongïalam ka Kur kila kam ba ka jingphah ïa ki nuksa na ka bynta ka jingpang ka long kaba donkam na ka bynta kano kano ka kaiphod ba lah ban ngeit jong ka jingpeit bniah ia ka met iap/ka kaiphod hadien ka jingiap, khamtam lada ka nongkhlad ka dei ka kynthei katkum ka ain” kila pynpaw.
Ki sengbhalang kila ong, haba peit ïa ki jingjia kiba la jia ha ka 4, 5, 6, 7 bad 8 tarik u Jymmang, 2024 bad hadien kata, “ngi pynkut ba ki jingdawa bad ki jingsngewkhia jong ki dkhot jong ka kur ki long kiba dei hok bad kiba don jingmut bad kumta, ngi ki sengbhalang ngi kyntu ban peit bniah ia kane ka jingpeit bniah bad jingsngewkhia jong ka kur. Ba ym shym la sdang ïa kano kano ka kam ha kaba ïadei bad ka jingtih ïa ka met ban pynlong ïa ka Histopathology. Ki bahaïing bahasem ne ka kur kim shim la ïoh ïa kino kino ki jingtip ïa ka kaiphod halor ka jinglap na ka jingtohkit kaba mardor jong ki pulit watla kila kyrpad ban ïoh ïa ka kaiphod.
Kila ong ba watla la jer kyrteng ïa ki 5 ngut ki para samla pule ha ka Ejahar ha ka 16 tarik u Jymmang, hynrei ym shym la don kano kano ka jingtohkit kaba bniah ïa kito ki briew da u IO jong katei ka kam.
“U pulit ophisar uba la pynhiar ïa ka metiap jong ka samla kaba la khlad noh shwa ban poi ki bahaïing hasem, wat hapdeng ka jingkyrpad jongki ban ap ïa ki bahaïing hasem bad dei ban pynlong ïa ka jingtohkit. U briew uba kam ba u dei u dkhot jongka Shillong Polytechnic dei ban wad bad tohkit bniah ïa u. Dei ban tohkit ïa ki paralok jong ka nongiap bad kylli ïa ki khubor hamsaia kaba kila ïakren ïakhana, namar ba ka lah ban don jingïadei bad ka jingiap jong ka,” la pynpaw ha ka dorkhas.
Kila pynskhem shuh shuh ba dei ban tohkit bniah ïa u Warden balei ba um don ha kata ka sngi kaba jia ka jingjia kaba sngewsih.
“Dei ban tohkit ïa u Director ka Shillong Polytechnic balei ba ym shym la don kano kano ka bor jongka jingkitkhlieh na katei ka jaka pule ha ka por ba aiti ïa ka met iap sha ki bahaïing” kila pynpaw bad ka bynrap ba u Director um shym la phone ne phah ïa kano kano ka jingsngewlem sha ki bahaïing bahasem jong ka samla pule kaba khlad noh haduh kine ki sngi, kaba long kaei kaei ka bym lah ban pdiang bad kaba lam sha ka jingsuba sniew”.
Kila pynpaw ruh ba ka Shillong Polytechnic ka dei ban pyndonkam ïa ki kor CCTV ban ïarap ïa ki samla pule ba kin lait na kino kino ki jingma ïa ka met bad ïa ka jingim ka jong ki.