Nongpoh, Nailar 31: Ki saw tylli ki Shnong ba hap ha Block II ki la pynpaw ba ki kwah ba ha kane ka jingïapynbeit pud ha ka wat kaba ar kin hap ha ka jylla Meghalaya bad ym ha ka jylla Assam.
Kitei ki saw tylli ki Shnong kiba kwah ban hap sha ka jylla Meghalaya bad kiba dei ruh hapoh ka jingpeit jingkhmih ka Raid Nongtung ki kynthup ïa ka Shnong Mawlen-I, Mawlen-II, Umshatri bad ka Shnong Pantalu kiba don sha shilliang ka Wah Umiam.
Naka liang ki nongïalam shnong mynta ka sngi ki la phah syndon da ka jingthoh sha ka seng KSU, North Khasi Hills District ban kyrpad lem sha ka sorkar Meghalaya lyngba u Chief Minister ba ha kane ka jingïapynbeit pud kaba dei ha ka wat kaba ar, kitei ki shnong ki kaba bun hi na ki nongshong shnong ki dei ki Khasi Khara kiba la dep ruh ban soi paidbah ha katei ka shithi ba kin shah kynthup haka jylla Meghalaya.
Ki Rangbah Shnong kitei ki saw tylli ki shnong ba kynthup naduh u Bah Linshon Mukhim, Rangbah Shnong ka Mawlen-II, u Bah Browel Khymdeit, Rangbah Shnong ka Pantalu, u Bah Phrian Khymdeit, Rangbah Shnong Umshatri bad u Bah Edrolin Saring, Rangbah Shnong ka Mawlen-I lem bad kiwei ki nongïalam shnong mynta ka sngi ki la kynduh ïa ki nongïalam ka KSU ban aiti ïa ka dorkhas ba ka seng KSU kan ïa kren sha ka sorkar Meghalaya ba kitei ki saw tylli ki shnong ki dei beit ban don sha ka jylla Meghalaya.
Haba kren sha ki lad pathai khubor mynta ka sngi kitei ki nongïalam kila pynpaw ba kitei ki 4 tylli ki shnong ki dei kiba shong ba sah da ki Khasi, kiba don ruh ïaki jaka kyntang, ki mawbynna bad kumjuh ka riti ka dustur bad kumba u Myntri Rangbah u la dep ban kular ba ki shnong Khasi baroh kin hap haka jylla Meghalaya katkum ka jingmynjur ki paidbah, ki ruh kila mih shakhmat ban pynpaw ba ki kwah ban don haka jylla Meghalaya ym sha ka jylla Assam.
Kum ki nongshong shnong ha katei ka thaiñ ki mad shibun ki jingeh naduh ka roi ka par ba kim don ka jingioh eiei naka sorkar bad kam don kano kano ka jingïadei bad ka Assam naduh ka ktien ka thylliej bad khamtam ki ju mad jingeh ban shah khrong khajna naki mar rep ba ki pynmih, namarkata ki kyrpad sha ka sorkar ba kadei ban phai khmat lem sha kitei ki shnong ba kin hap haka jylla Meghalaya ha kane ka jingpynbeit pud ka wat ba ar.
Naka liang u Samla Ferdinald Kharkamni President ka KSU haba kren ha katei ka sngi u la ong kumba kine ki saw shnong ki la wan ai da ka dorkhas sha ka seng ban ïarap tuklar lem ban pynhap ïa kitei ki shnoing sha ka jylla Meghalaya bad ruh ba ki la shim ïa ka rai ban don sha ka jylla Meghalaya, ka seng KSU kan sa pynpoi ïa katei ka dorkhas sha ka sorkar lyngba u Myntri Rangbah ba ha kane ka jingïapynbeit pud kitei ki shnong ki dei ban hap sha ka jylla Meghalaya namar kitei ki shnong ki duh shibun ka bhah bad ki kam pynroi bad im hapdeng ka jingjynjar.
Shuh shuh, u la kren ong ruh ba ka seng ka dawa na ka sorkar jylla lyngba u Myntri Rangbah ba u dei ban shim khia halor kane ka bynta khamtam kitei ki 4 shnong kiba la kwah ban don sha Meghalaya nalor ki 18 tylli ki shnong ha Block II kila dep ban pynsngew sha ka sorkar ba ki dei ban don ha Meghalaya bad ym ban leit sha ka Assam ha kaba la tip shai kiba bun ki paidbah kim kwah sha ka jylla Assam bad ki kwah ban hap sha ka jylla Meghalaya ha kane ka jingpynbeit pud pynbeit sam kaba la dei sa ha ka wat kaba ar, u la bynrap.
