Dawa ki samla pule ka NEHU ba dei ban thung mardor da u Professor ba la shakri slem tam kum u acting VC

Shillong, Lber 21: Ki samla pule ka North Eastern Hill University (NEHU) ha ka sngi Thohdieng ki la dawa badei ban thung mardor ïa u senior most professor kum u acting vice chancellor ha kaba ka la bteng ruh ban kyntait ïa ka jingtreikam kaba najngai jong u Prof PS Shukla, uba la shimti ïa ka kam kum u vice chancellor da ka ktien ha kane ka bnai.
Kane ka jingdawa ka la wan hadien ba ka jingai por kaba 48 kynta ka la kut kaba ki la phah sha ka Ministry of Education da ka North Eastern Hill University Students’ Union (NEHUSU), North Eastern Hill University Teachers Association (NEHUTA) bad ka North Eastern Hill University Non-Teaching Staff Association (NEHUNSA) ha ka sngi Palei.
Haba kren sha ki lad pathai khubor u President ka NEHUSU u Sandy Sohtun u la ong namar ba ka ministry kam ai ka jubab halor ka jingdawa jong ki, ki la rai ban dawa ba dei ban thung mardor da u senior most professor ban long kum u acting VC.
“Ka jingai por kaba 48 kynta ka la kut ha ka sngi Palei bad mynta ka step ngi la don ka jingïasyllok bad ki bor bapher bapher ha kaba ngi la ong ïa ki ban ïaid katkum ki kyndon ban thung da u senior most professor kum u acting VC,” u la ong.
“Namarba u senior most professor N Saha u dang don ha ka shuti, ngi hap ban kynduh ïa u Professor uba ar uba ka kham rim bad kham slem ha ka kam ban khmih ïa ka universty na ka bynta ban thung kum u acting VC jong ka university,” bynrap u samla Sohtun.
U la pyntip ba ka Union ka dang ap ban ïoh kano kano ka jubab bad ka jingïakren na ka sorkar jylla halor kane ka jingjia kaba dang bteng hapoh ka university haduh mynta.
Ha kajuh ka por kine ki lai tylli ki seng ki la pynthikna ba kin ym shah da lei lei ïa u Prof Shukla ba un wanphai sha ka campus bad ki la banjur ïa ka jingïaineh jong ki halor ka jingdawa ba u VC u dei ban iehnoh kam mardor kum u VC ka NEHU.