Nongstoiñ, Nailar 04 : Ka jingpynbha bad siang rong ïa ka surok na Mawdiang sha Mawkyllon kaba jngai kumba ar kilomitar shiteng la lah ban pyndep katba na Mawkyllon shaduh Langdongdai kaba pynïasoh bad ka surok kaba mih na Malangkona kam pat don satia.
U bah Gardenning Rongrin uwei na ki riew rangbah ka thaiñ haba ïakren bad u nongthohkhubor jong u Mawphor u la ong ba ka jingbym don ïa ka surok kaba biang haduh Langdongdai ka la buh ïa ka jingeh kaba khraw ïa ki paidbah namar ban ïaid da ka kjat naduh Langdongdai kata naduh Mawkyllon ka shem shitom haduh katta katta namar ki paidbah jong katei ka thaiñ naduh Mawsmai, Mawguru, Langsaw bad kiwei kiwei ki shnong man la ka sngi ki leit don kam sha Riangdo.
U la ong ruh ba kiba shem jingeh palat ki dei ki longkmie kiba armet kiba don kam ban leit phah check up man ka por sha Riangdo CHC nagta haba don kiba pang ba shitom ruh hap ban kit da u briew namar bun don kali.Ha kajuh ka por la ïoh ban ïakren bad u bah Birbor Riangtem secretary ka hima Nonglang Sirdarship ha kaba u la ong ba baroh ki shnong kiba don ha katei ka thaiñ naduh Mawkyllon haduh Malangkona ki dei kiba hap ha ka hima Nonglang Sirdarship bad kum u nongpeit nong khmih ïa ka synshar khaddar, ka khia ka shon, ka bha ka miat bad ka suk ka saiñ jong ki khun ki raïot hapoh ka hima um lah satia ban shu sngap bad ban shu peit kai ïa ki khun ki raïot jopng ka hima haba ki mad ïa ki jingeh ha kiba bun ki liang la la long ha ka leit ka wan, ka kit ka bah bad khamtam ïa kiba pang ba shitom kiba ha ka por lyiur la hap ban kit da ki briew naduh Langdongdai haduh Mawkyllon ba kin leit phah sumar ha Riangdo CHC.
Utei u rangbah u la ong ruh ba na ka liang ki paidbah jong katei ka thaiñki la pynsgew la bun sien bun wat sha ka tnad PWD ba kan pynsgew sha ka sorkar ba kan pynïoh ïa ka surok kaba biang hynrei la bun sien bun wat hynrei haduh mynta ym pat ïohi dak ei ei.
U la ong ruh ba na ka liang ki paidbah katei ka thaiñ ki la kyntu ïa ki rangbah ka hima bad ki nongsynshar shnong ba kin khot da ka jingïalang paidbah ban ïa pyrkhat halor katei ka jingbym leh ei ei jong ka sorkar namar lada kin shu sngap imat ka sorkar kam patiaw satia.U bah Riangtem u la ong ruh ba na ka liang ki rangbah ka hima ruh ki la don ka jingïapyrkhat kumno ban thaw lad ban leit ïakynduh ïa u Myntri ka tnad PWD ban ïakren bad kyrpad ba un phai khmat lem ban pynïoh surok namar lada shu sngap ki shnong ha katei ka thaiñ kin ym ïoh surok lano lano ruh.
