Mawkyrwat, Jymmang 28: Ki nongshong shnong jong kawei ka shnong kaba dang hap hapoh u pud u sam jong ka South West Khasi Hills District da ka jingsngewkhia bad jingsngewlem na ka bynta ki bahaïing hasem jong kawei ka samla lud kaba dang don hapdeng ka rta kaba 17 snem lane 18 snem eiei kaba la shah leh be-ijot ia ki arngut ki runar dang shen, ki la pynlong da ka jingïaïaid paidbah ban pynrem jur ïa ki runar kiba donkti ha kane kam pap kam sang.
Ha kane ka jingïaïaid paidbah la ïashim bynta lang naduh ki nongïalam shnong, ryngkat ki Seng longkmie bad ki sengbhalang bapher kiba la pynrem jur ïa kine ki runar kiba la donkti ban leh ïa kane ka kam bymman bad ki la dawa ruh ïa ki bor jong ka aiñ ba ki dei ban kem mardor bad pynshitom katkum ka aiñ ïa ki briew kiba donkti.
Lah ban pynkynmaw ba ïa kane ka kam runar halor ka jingshah batbor jong kawei ka khynnah kynthei ka dei kaba la jia ha ka 15 tarik u Jymmang, 2022 bad ki nongleh ïa kane ka kam ki dei kiba la kynjoh ha ka ka rta kaba 21 snem bad 30 snem eiei.
Kane ka long katkum u kyrwoh khubor na u Secretary jong ka Seng Samla Shnong.
