Shillong, Jylliew 25: Da kiba bun ngut ki paidbah nongkynshew pisa kiba long ki Nongshong Shnong napoh ka thaiñ Mawsynram Block ki la pynpaw ka jingsngewsih kaba jur halor ki bynta bapher bapher haba ki shem ïa uwei na ki Nongtrei jong katei ka Bank kaba don hapoh ka Shnong Mawsynram uba la pyrshang ban leh baheh bad kren ki kyntien khlem akor kiba long ki tien sih tien sang ïa ki Nongkynshew pisa khlem da salia wat la ki long kiba la tymmen ne rangbah ruh kumjuh.
Katei ka bank kadei kaba kyrteng ka Meghalaya Co-operative Apex Bank Ltd. (MCAB), kaba don hapoh ka Shnong Mawsynram kum ka Branch. Utei uwei na ki Nongtrei jongkatei ka bank u kyrteng u Indrajit Bhowal bad naduh ba upoi ma u hapoh katei ka bank kiba bun na ki paidbah nongkynshew pisa kim ju ïoh shuh ïa ka jingsuk ne ka jingshemphang halor ki bynta kiba bun kiba na ka liang jongka bank kaba dei ban pynpaw shai sha ki Paidbah kiba long kum ki kynrad hapoh la ka jong ka bank ba ki don pisa. Bunsien manla kipor ha kaba u la shim ïa ki nongkynshew pisa jongka bank ba ki long tang kum ki shakri ki jong u shimet bad u la ñiew ruh ïa ki tang kum ki ksew kiba ïeng surok khlem da wanrah kano kano ka jingsuk wat lada ki dei ban leit phai noh sha jngai ïing manla ka por da kaba ki leit shapoh ka bank ban kynshew pisa ne wat ba dei ba kin sei ïa ka pisa lajong ruh kumjuh. Bun ngut ki la kdew ba manla ki por u ju ïai beh ïa ki nongkynshew pisa wat la dei ba tang khyndiat ruh ba kin pan jingïarap na bynta la ka jong ka kam.
Ki paidbah nongshong shnong khamtam kiba la rangbah kiba la long ruh ki nongkynshew pisa kiba la rim tam jong katei ka bank kin nym lah ban tip lut pura na sdang ha kut halor kiba bun ki rukom kumba ka bank ka ïaid halor kine ki sngi kiba mynta nalor ruh ba kim pat da dei kiba la nang la stad lut kumba ki im shapoh ka thaiñ nongkyndong bad ki ju ïai donkam ba ki nongtrei jong kano kano ka bank ki dei ban ai ka jingïarap ban batai shai lang halor kiba bun kiliang. Manla kapor haba ki leit donkam hapoh ka bank ki donkam ïa ki Nongtrei Bank ban ai jingsynran lem ïa ki khnang ban ïoh ïa ki jingdonkam kumba ki dei bad ban long ruh kum ka bank kaba ki dei ban ïoh ïa ka jingshaniah kaba pura hapdeng baroh shirta na bynta ka lawei jong manla iwei pa iwei napdeng ki nongkynshew pisa.
Na ka liang jongki paidbah nongkynshew pisa ki la ïoh ban pynpaw ruh sha u Bah banshai Marbaniang uba dei uwei napdeng ki nongtrei mon sngewbha napoh katei ka thaiñ halor ka jingleh donbor jong utei u briew u bym don shuh ïa ka nongrim katkum ha la ka jong ka iktiar ha kaba kumno u dei ban ñiewkor ïa la ki jong ki Nongkynshew pisa hapoh ka Bank.
U Bah Banshai Marbaniang u la ïoh ban ai ka jingkyrshan ha ryngkat lang bad ki paidbah nongkynshew pisa jong ka MCAB Mawsynram Branch da kaba u la ïoh ban ïakynduh ia u Bah Osmand E.J.Nongbri uba dei u Managing Director jong ka Meghalaya Co-operative Apex Bank Ltd. (MCAB), Head Office kaba don hapoh Shillong bad ban ai ruh da ka jingthoh katkum ka hok jongki paidbah bad ban kdew shai lada ngi phai halor ka Fundamental Rights katkum ka Indian Constitution kaba ong “Banking should be made to preserve civil rights and democratic principles based on equality for all members of society”.
Baroh ki Paidbah Nongkynshew Pisa jongka Meghalaya Co-operative Apex Bank (MCAB) kaba don hapoh ka Shnong Mawsynram ki la ïeng bad dawa jur lyngba u Managing Director jong ka MCAB Ltd. Head Office kaba don hapoh Shillong ban weng noh ïa utei u Nongtrei jong katei ka Bank uba kyrteng u Indrajit Bhowal ha ryngkat da ka jingkyrshan lang da u Bah Banshai Marbaniang uba long uwei na ki Nongtrei mon sngewbha (social activist) napoh katei ka thaiñ. Na ka liang jong ki paidbah ki la ïoh da kaba ïeng skhem ban dawa ïa la kajong ka hok ba dei ban weng ïa utei u Nongtrei bad ban thung thymmai ruh da kiwei pat ki Nongtrei kiba long kum ki briew kiba sngewthuh bad shemphang haba kumno ban wanrah ïa ka jingshngaiñ na bynta ki nongkynshew pisa ha baroh jongka bank. Ki la pynpaw ruh ba ym dei shuh ban thep kam ïa kum utei u briew halor ki bynta kiba ïadei bad ki Nongkynshew Pisa jong ka Bank lada dei sha kano kano ruh ka Shnong ne ka Branch jongka MCAB bank Ltd. kaba don hapoh ka Jylla Meghalaya.
