Dawa ki paid Khasi Jaiñtia ban pynrung ïa ka Ktien Khasi ha ki skul ha Barak Valley

Shillong, Lber 28: Ki paid Khasi Jaiñtia kiba shong ba sah ha Barak Valley jong ka Assam hapoh ka Barak Valley Khasi Jaiñtia People Welfare Organisation (BVKJPWO) ban pynrung noh ïa ka jinghikai ha ka ktien Khasi ha ki skul kiba don ha Barak Valley, khnang ba kan nym wanrah jingeh ïa ki paid Khasi kiba shong ba sah ha ki bynta jong ka jylla Assam.
Ïa kane ka jingdawa la pynsngew, namar ba ka Education Policy jong ka snem 2020, ka ong ba baroh ki skul naduh Class A haduh Class V kin hap ban pule da ka ktien trai jong ka jylla ne ka mother tongue.
Kane ka Seng kaba kup lut ïa baroh ki paid Khasi Jaiñtia ha ki them jong ka Barak ha Assam, ha ka jingthoh ba la soi da u Bah Charles Rymbai, President bad u Bah Wanbor Pdang, Secretary, la ong ba ka kiba bun ki skul kiba don ha ki shnong Khasi kim shym la hikai satia ïa ka ktien Khasi ha ki skul, hynrei la hikai da kiwei pat ki jait ktien. Kane ka la pynlong ïa kiba bun ki khynnah ba kin pep skul noh bad ka la wanrah ka jingduna khynnah ha kiba bun tylli ki skul. Ka Seng ka ong ba lada hikai da ka ktien Khasi kine ki skul kin dap bad kin bun ki khynnah skul.
Kawei pat ka jingdawa jong ki paid Khasi ha katei ka District, ka long ban pynïoh jaka ha nongbah Silchar na ka bynta ban shna Hostel ïa ki samla pule kiba leit pule ha kane ka nongbah. Nangta kane ka jaka kan long ruh kum ka Guest House bad Cultural Centre na ka bynta ki paid Khasi kiba ju poi sha kane ka nongbah, ym tang na ka bynta ka jingpule, hynrei ban leit wad jingsumar haba pang ba shitom ruh. Ka Seng ka ong ka jingbym don ka Hostel, ka buh jingeh ïa ki samla pule, khamtam ki samla kynthei, ha kaba ki ïakynduh bun ki jingeh haba ki sah ha ki ïing ba shu wai. “Tang ba ka daw ba kim ïoh ka jaka sah kaba biang, kiba bun ki samla pule kynthei ki la hap ban pep noh shiteng por ïa ka jingpule jong ki”, la ong ka BVKJPWO.
Sa kawei pat ka jingdawa ka long ban pynïoh skim um lyngba ka JJM sha ki 12 tylli ki shnong Khasi kiba don sha ki jaka ba kyndong bha jong ka Cachar District, namar ba ki nongshongshnong nangne ki hap ban leit tong um sha ki jaka ba jngai bad hap ban ïaid da kjat bun bun kynta.
Ha kajuh ka por, ka BVKJPWO, ka la pynlong ïa ka Annual Convention kaba 32 ne ka jingïakynduh lang kaba shisien shisnem jong ki paid Khasi Jaiñtia kiba shong ba sah ha Barak Valley. Ïa kane ka jingïakynduh la pynlong ha Nagaghat, Cachar Hills, ha kaba palat shiphew hajar ngut ki paid Khasi Pnar ki la poi sha kane ka jingïakynduh lang da kaba pynlong ïa ki prokram bapher bapher.
Ha kane ka jingïalang la don lang ki nongïalam jong ka Seng, kynthup ruh ïa u Dr. Moses Kharbithai, uba long u Chief Adviser jong ka Seng.