Dawa ki Khristan ban pynshitom kat kum ka aiñ ïa u Nongïalam ka VHP ba kynnoh khaïi drok ïa ki Balang

Guwahati, Naiwieng 6 : Lai tylli ki seng Khristan kila phah lang ïa kawei ka jingujor sha ki bor District ka Dima Hasao, ba dawa ban leh eiei kat kum ki kyndon aiñ pyrshah ïa u Nongïalam ka VHP u Surendra Jain halor ka jingkynnoh jongu ba ki Balang ki donkti ha ki kam khaïi droks.
Kine ki Seng kim shym la batai shai ïa ki jingkren u Jain hynrei kila batai ba ka jingujor ka dei kaba la mudui ban phah ïa ka khubor ïa ka jingsngew kyndit, jingmong bad jingsngewsih halor ki jingkynoh u Jain ba pyrshang ban pynthohbria ïa ki paid Khristan.
Kane ka jingkren u Jain ka dei kaba la jia ha ka jingïalang plie ïa ka Joya Thaosen Computer Learning Centre ha Haflong myn ha ka 27 tarik Risaw.
U Jain ula ong “Mynta nga sngewthuh ba ka kam khaïi droks ka dei kaba la leh da ki Balang ha ka lynti kaba heh bha. Ha kawei ka liang,ki Balang kila pynjot ïa ka kolshor, ñiew beiñ ïa ki dustur bad jingngeit hangne bad pynjot ruh ïa ka jingim jong ki briew hangne”.
Ula bynrap “Ka jingpynkylla niam ka dei ka jingeh, ngi la leh eiei ïa ka hynrei ngin sa ong ruh ïa ki Balang ba katba ki Khristan ki dang long laitluid ban bud ïala ka niam, kano kano ka jingpynthut ïa ka suk ka saiñ, jingbym burom ïa ki jingngeit kiwei,lane donkti ha ki kam khaïi droks, ki dei kiba ka imlang sahlang kan ym sngap jar satia”.
Ka mudui jong kine ki seng Khristan kala pynrem ïa ka jingkren u Jain bad ong ba ki dei kiba khlem nongrim bad ka bym lah satia ban pdiang haba pynksan ba kum kine ki jingkren, ki wahrah ïa ka jingbym shaniah, jingpynïapait ïapra bad pynjot ïa ka jingïalong kawei bad ïa imsuk imsaiñ jong baroh ha Assam bad ka Ri baroh kawei.