Dawa ki 3 Sengbhalang ban thung nonghikai Garo ha ki Primary School ha Khasi Hills
Mawkyrwat, Risaw 03: Ki lai tylli ki kynhun kiba kynthup ïa ka All Khasi Hills Achik Federation (AKHAF), Garo Students’ Union (GSU), South West Khasi Hills District Unit bad ka Achik Holestic Awakening Movement (AHAM) ha ka jingïalang ba la long ha 14 tarik u ‘Nailur, 2022 ha Khonjoy, South West Khasi Hills District da kawei ka jingmut ki ïa kut ban pynsngew ha ki bor ba halor ban thung noh da ki nonghikai Garo kiba tbit bad nang ïa ka ktien Garo ban hikai ïa ki khynnah kiba kren da ka ktien Garo kata ha ki ‘Lower Primary’ ha ki bynta jong ka Khasi Hills kaba ïa hap ruh bad ka ‘Section 29 (f) of Right of Children to Free and Compulsory Education Act, 2009’.
Shuh shuh ki la kdew ruh ba ha ka Section 29 (f) jong katei ka kyndon ka ong ba ka ktien kaba pyndonkam ban hikai ka dei ka ktien ba u ne ka khynnah ki kren naduh dang rit. Shuh shuh nalor kitei ki jingdawa haneng kum ki kynhun kin don kano kano ka jingpyrshah ha kaba ïa dei bad ka jingthung nonghikai ha ki ‘Upper Primary Level’ ha kino kino ki jaka pule bad ki kloi ban ïa shimbynta bad ïatreilang bad ki nongtrei bapher bapher ban kyntiew ïa ka jingnang jingstad ha ki jaka baroh kiba la shah ieh beiñ bad ñiew shilliang khmat ha kaba ïa dei bad ka pule puthi da ka sorkar jylla bad ong ruh ba naduh ki por ba ka jylla ka la ïoh ïa la ka jong ka jylla ba pura ha u snem 1972.
Ka jingdawa jong ki lai kynhun kam don kano kano ka jingñiew shilliang khmat ïano ïano ruh ne ka imlang ka sahlang hynrei ka dei na ka bynta ka jingbha ki samla Garo kiba trei shitom ban pyndep ïa ki jingpule jong ki wat hadpeng ki jingeh ba bun kib aki mad kum ha ka ïoh ka kot. Kane kan ïaid ryngkat ruh bad ka jingïaleh ban kynthup lang ïa ka ktien Garo bad Khasi ha ka Eight Schedule jong ka Constituency jong ka Ri India ha kaba Sorkar kumjuh ruh ki NGO’s bapher bapher ki la ïasnohktilang an buh ïa kane ka jingdawa na ka sorkar India.
Kane ka long katkum ka kyrwoh khubor na u Manuel CH Marak, General Secretary jong ka All Khasi Hills Achik Federation (AKHAF).