Dawa khang ïa ki Weighbridge Cum-Forest Check point ka JHADC ba pynïeng khlem jingbit

Jowai, Naitung 17: Ka Hynñiewtrep Integrated Territorial Organisation (HITO) mynta ka sngi ka kwah ban pynshai paidbah halor ka khubor jingpynshai na ka Jaiñtia Hills Autonomous District Council ha kaba ïadei bad ki Weighbridge Cum-Forest Check point kiba don ha East Jaiñtia Hills bad ka jingthung Agent ïa u Sevenborn Tang kum u riew shimet ban pynïaid ïa kitei ki Check point.
U General Secretary sengkmie u bah Wanbun N Dkhar haka jingkren sha ki lad pathai khubor mynta ka sngi kaba dei ka lyngkhuh sngi ïap u Tirot Sing, ula ong kum ka seng ka kwah ban pynshai paidbah halor ka jingpynshai da rap jot jong ka JHADC lyngba ka Secretary Executive Committee.
Ula ong ka jingdon kine ki jaka lum khana ka Council kum ka Sonapur Weight Bridge Cum-Forest Check point bad ïaka Ratacherra forest beat office, kala pynlyngngoh ïa ka seng ba ka Council kam don ïa kita ki Weight Bridge katkum ka jingpynshai, hynrei kutkum ka RIT bad ka Budget 2025-2026 jong ka Council ka pawshai ba ki don haduh lai tylli ki Weight Bridge kata ka Mookyndur Weighbridge, Sonapur Weighbridge bad ka Dawki Weighbridge.
Shuh shuh ka seng kala ong kane ka jingpynshai jong ka JHADC ka jingthung Agent ïa u Sevenborn Tang ban peit bad pynïaid ïa baroh ki Forest Revenue Station jong ka Council haba nujor ïa ka jingpoi ka pisa ka long kaba myntoi shibun haba nujor ïa ki snem kiba la dep.
“Hynrei katkum ka Budget 2024-2025 ka jingïoh nong ka Council na ki Weighbridge Cum-Forest Check point ka long 11 lak 50 hajar tyngka, hynrei na ka bynta u snem 2025-2026 haba aiti noh sha ki riew shimet ka jingïoh ka long 5 lak tyngka, kumno kane ka khamheh ka 5 lak ban ïa ka 11 lak, la buh jingkylli ka seng da kaba ong kane ka jingda ka long tang ban ïoh bam ei ïa ka pisa ka Council.
Ka seng ka dawa jur ban khang noh shi syndon ïa kitei ki ar tylli ki Weighbridge Cum-Forest Check point ka Council kiba don ha East Jaiñtia Hills, katkum ka jingkam da ka JHADC kam don kita ki Weighbridge, katba ha ki kot ki sla ka paw pat ba ki don kita ki Weighbridge Cum-Forest Check point.
Ka seng kala pynshai katkum ka Control of National Highway (Land & Trafic) Act, 2022 ka kdew shai kino kino ki jingtei ha ki surok bah (NH), kim lah ban pynïeng khlem da ïoh jingbit jong ka Ministry of Road Transport and Highways (MoRTH) ka sorkar India la pynkut u ma Wanbun Dkhar.