Nongstoiñ, Naitung 11: Ka West Khasi Hills Students Union (WKSU) ka la dawa ïa ka Sorkar Jylla ba kan plie noh ïa ka Maternity Children’s Hospital kaba don ha Nongstoiñ, West Khasi Hills.
Ïa kane ka jingdawa ki nongïalam ka seng ki la dep buh mynta ka sngi hakhmat u Mission Director ka National Health Mission u Ram Kumar ha kamra treikam jong u.
U President ka WKSU samla Despitol Sun u la ïathuh ba u Ram Kumar u la pan por haduh phra taiew lane ar bnai na ka seng. Haba pyntip ruh ba ka NHM ka dang ap ban ioh ïa ka jingmynjur ïa ka mang tyngka na ka tnad Planning bad Finance, ban mang pisa ha ka ban thied ïa ki tiar ai jingsumar ïa ki longkmie ba kha khunlung lem bad ki khunlung nalor ban thung nongtrei ha kane ka Hospital kaba 50 jingthiah.
“Ka Seng ka la rai ban ap ïa kane ka por ba la kular da une u heh ka NHM”, u la ong haba maham ba lada kane ka jingkular kam urlong, ka seng kam banse ban shim da ki sienjam kiba tyngeh.
