Khliehriat jymmang 27: Ka Dorbar Shnong Wapungskur, East Jaiñtia Hills, ka la dawa na ka company shna surok, ka G.R Infra Projects Ltd, ba ka dei ban maramot pynbha bad ruh ban trei pyndep ïa ki bynta ba dang sahteng jong ka surok National Highway – 6, East Jaiñtia Hills District, kaba iaid lyngba na ka shnong Wapungskur.
Ki nongialam jong ka Dorbar Shnong Wapungskur hapoh ka jingialam jong u Waheh Shnong, u bah Deolangki Dkhar, dang myn ha kine ki khyndiat sngi ba la leit, ki la leit ban ïa kynduh ïa ki heh jong ka GR Infra Projects Ltd bad ki la aiti ruh ïa ka dorkhas ha ki heh jong ka G.R.Infra bad lyngba ka dorkhas ruh ki la dawa ban maramot pynbha ruh ïa ki bynta ba shlei um bad ba lang um hapdeng surok, kumjuh ruh ban shna pyndep ïa ki ki nala um (side drains) kiba dangsahteng, ki lynti iaid kjat (footpaths), ki guard wall, ki traffic lights bad traffic signals, lem bad ki rumble strips.
Kat kum ba long mynta, ki don bun ki bynta ha ka surok NH-6 kiba hap hapoh jong ka shnong Wapungskur kiba shait dap um smam hapdeng surok ha ka por lyiur ba jur slap bad ka um ka tuid pathar bad tuid kyrthep ruh wat shaduh ki baranda iïng briew bad sha ki jaka bym dei ban tuid bad kane baroh ka dei na ka daw jong ka jingbym biang ki nala um kiba la dep shna ha katei ka surok bad ruh na ka daw jong ka jingbym shna pyndep lut ïa baroh ki nala wat haduh mynta ruh wat la ïa ka jingsiew bai luksan lah dep pyllait sha ki trai jaka naduh mynno re.
