Jowai, Jylliew 18: Ki dkhot jong ka Voice of the People Party (VPP) ba la lamkhmat da u Organising Secretary u Bah Damwanhi Rymbai, ka President jong ka VPP Narpuh Circle Kong Deiwi Tongper bad ki dkhot ki la aiti da ka dorkhas ha u Chief Executive Member (CEM) jong ka Jaiñtia Hills Autonomous District Council (JHADC) Bah Thombor Shiwat ban dawa ba ka Council ka dei ban siew noh ïa ka tulop jong ki nongtrei ka JHADC kaba la sah mynta la 13 bnai.
U Bah Rymbai ula ong ruh ba ka Council ka dei ban siew lut ïa ka tulop jong ki nongtrei hapoh ka 30 tarik mynta u bnai bad ong ruh ba ka Council kam dei ban siew tang shi bnai ne ar bnai hynrei dei ban siew lut shwa ka lehniam Behdeiñkhlam.
U la ong ruh ba lada ka Council kam lah ban siew ïa ka tulop jong ki nongtrei, ki nongïalam jong ka VPP na rilum Jaiñtia kin sa shong pyrkhat da kumwei pat.
