Dawa ka Synjuk Waheh Shong Ri Jaiñtia ban pyntreikam ia ka Saipung Block na Saipung

Khliehriat Iaiong 4: Ka Synjuk Waheh Shnong Ri Jaiñtia ha ka shithi ba la aiti ha u Deputy Commissio-ner ka East Jaiñtia Hills District myn ha ka 1 tarkik u iaïong 2022 ka la buh ka jingkyrpad ban pynurlong kumba ju long mynshwa ba ka ophis C&RD Block Saipung kan treikam pura na Saipung hi, namar kumba long mynta kane ka ophis ka treikam na Latyrke ba ka Synjuk ka kyntu ruh ïa u DC ba un sngewbha ban tuklar lem halor kane.
La pynpaw ruh ba ïa ka ophis C&RD Block Saipung la pyn long naduh u snem 2001, hynrei ïa ki kam ophis pat la trei na Khliehriat, hynrei da ka jingshim khia ka sorkar kaba myn ha ki snem ba la leit, ka la lah ban shna ïa ka iïng ophis treikam kaba heh (office Building) ha shnong Saipung, ha kaba la tei ruh ïa ki jaka sah ki nongtrei (Quarters), hynrei watla katta ruh ki nongtrei ki la shu iehnoh ïing jah noh kumto mynta.
Ha u snem 2012 ka ophis ka treikam na Saipung, hynrei khlem poi pyrkhat pat bad ka long kaba sniew bok ruh ba ha u snem 2016 bad haduh mynta kane ka ophis ka la treikam na Latyke bad la rah noh sha Latyke, ka shnong kaba don hajan Sutnga bad ïa ka daw tynrai halor ka jingpynkynriah noh ïa kane ka ophis ym shym la pynshai sah ki paidbah.
Katkum ka shithi ba la soi da u President Synjuk Waheh Shnong Ri Jaiñtia, u bah Zosiama Thianglai bad u Secretary, u bah Varmingthanga, ki la ong ba kane ka jingpynkynriah ïa ka ophis sha Latyrke ka la wanrah ka jingthut ha kiba bun ki jait jingpyntreikam kiba na ka ophis Block kiba dei ki skim sorkar khamtam eh ha kito ki shnong kiba kyndong kiba dang hap hapoh u pud u sam jong ka Saipung Sidarship, namar kine ki shnong mynta ki la don jngai bha na ka ophis Block kaba don mynta ha Latyrke, kane ka la wanrah ïa ka jingsuki ka rukom treikam kaba iadei bad ki skim ki ban kyntiew ïa ka ioh ka kot jong ki paidbah ka thaiñ.
La kynthoh ruh ba namar ka jingbym treikam kane ka ophis C&RD Block na ka jaka ba la buh na Saipung ka wanrah ruh ka jingthut bad jingdkhoh ki kam ki jam ha kiba bun ki kam pynroi kiba wan na kiwei kiwei ki tnat treikam ruh.
Wat ka ophis kaba dei ban peit ïa ka bha ka miat jong ki khynnah ruh kum ka ophis jong ka Child Development Project Officer Saipung ka la don ka jingdkhoh ha ka rukom treikam haduh mynta mynne namar kane ka tnat ruh kam shym la treikam pura na Saipung haduh mynta mynne, ym dei tang kine ki tnat, hynrei ki don ruh kiwei kiwei ki tnat sorkar, ki bym shym la treikam na ki ophis treikam kiba la buh ha Saioung ha kaba ki iïng ophis la dep ban tei bad la shu iehnoh ïing jah beit ïa ki khlem pyndonkam satia, kane ka long ka jingjah burom ïa ka sorkar bad paw shynna ba kam sym la don ka jing shim khia ban iarap ïa ki paidbah bad ka wanrah ruh ïa ka jingduh jingkyr men ha kiba bun ba lang.
Kum ban pynurlong biang ïa ka jingangnud ki paidbah kiba ap khmih lynti ïa ki jingtreikam pura ki tnat sorkar na Saipung kumba la dep buh dak naduh mynshwa, ka Synjuk Waheh Shnong Ri Jaiñtia ka buh ka jing kyrpad ïa u Deputy Commissioner ka East Jaintia Hills District ba un sngewbha ban tuklar lem halor kane, khamtam eh ban wanrah biang ïa ka C&RD Block sha Saipung ba kan treikam pura na ka ophis kaba la dep tei naduh myn shwa bad ruh ba ki nong trei kin sah ha ki jaka sah ba la dep tei kumba la mang da ka sorkar naduh mynshwa.
Ha kajuh ka por, ka Synjuk Waheh Shnong Ri Lum Jaintia, ka ai ka jingkhublei sngewnguh ïa u Deputy Commissioner, u Abhilash Banarwal, IAS uba la wan ban ïuh kjat ha shnong Saipung bad sakhi da la ki jong ki khmat ïa ka jinglong jingman ki shnong ki thaw kiba don ha ka thaiñ Saipung, kiba dang donkam shibun ki jingkyrshan lem na ki tnat sorkar bad kyntiew ïa ka roi ka kiew jong ka thaiñ.
Ha kajuh ka por, u Abhilash Banarwal, u la iohi ruh da la ki jong ki khmat ïa ki iïng sorkar, ki ophis sorkar ha Saipung kiba la shu iehnoh iïngjah khlem da pyndonkam ïa ki da ki nongtrei kiba dei ban trei.