Shillong, Naitung, 23: Ka Synjuk Ki Nongsynshar Shnong Ka Bri U Hynniewtrep (SNSBH), kaba long ka kynhun jong ki khlieh nongsynshar shnong ha ka sngi U Blei ka la dawa ïa ka Sorkar Pdeng ban pynjari da ka President’s Rule ha Manipur khnang ban wanrah biang ïa ka shongsuk shongsaiñ.
Ha ka shithi ba la phah sha u Myntri Rangbahduh ka ri Narendra Modi, u general secretary jong ka SNSBH u Bah RL Blah u la ong, “dei ban pynjari da ka Presidents Rule ha Manipur khnang ban wanrah biang ïa ka shongsuk shongsaiñ bad ba ka Sorkar kan ïoh biang ïa ka jingshahniah.”
“Hadien ba la pynjari ïa ka jingsynshar President, dei ban pynlong ïa ka jingtohkit ban lap ïa kiba donkti ban kynshoit bad kiba pynkhih thma halor kane ka jingjia. Ïa kine ki briew dei ban pynshitom katkum ki kyndon jong ka aiñ,” u la ong.
U Bah Blah u la ong ba ka Sorkar ka dei ban siew bailutksan sha baroh ki lanot jong ki jaidbynriew khnang ba kin dup lah ban tei thymmai biang ïa ki jingjulor.
“Donkam ban phah ïa ka kynhun ka bym ïashah liang bad ka bym don bynta eiei bad kano kano ka seng saiñ pyrthei lane kano kano ka jingtuklar khnang ba yn dup lah ban wanrah ïa ka jingïasuk ha ka jylla Manipur,” ula ong.
Haba pynpaw ba ka ka pyrshah jur ïa ki kam bymman ba la leh pyrshah ïa ki kynthei ha Manipur, u Bah Blah u la ong, “ha Manipur ka la pluh ha ka por ba phi la long kum u Myntri Rangbahduh jong ka ri India. Ngi hap ban ong ka jingjia namarba hi la pyni ïa ka jinglah jong phi ha kiba bun ki liang bad kum katkum ka bor jong phi ka la pynngeit ïa ngi ba ka jingïakynad ha Manipur kan kut tang lada phi leh ïa kata.”
