Nongpoh Ïaiong 11: Da ka jingdon shibun ki diengbah kiba la buh jingma ïa ki paidbah nongshong shnong hapoh ka shnong Quinine Nongladew ha Ri Bhoi District ha kane ka aiom ban sa don ka erïong, ka Dorbar Shnong ka la pynpaw ïa ka jingsngewkhia bad ka buh ruh ka jingkyrpad ïa ka tnad Forest ba ka dei ban wan jurip bad ban pom noh ïa kino kino ki diengbah kiba lah ban wan rah jingma ha kane ka aiom ba khie erïong.
Ïa kane ka jingma la pynpaw ruh ïa ka jingsngewkhia bad ka jingma ym tang ki nongïalam shnong bad ki paidbah nongshong shnong, hynrei kiba bun ki nongshong dukan ha katei ka jaka ruh ki la pynpaw ïa ka jingsngewkhia ba ki tieng ba da ka jingdon kitei ki diengbah ka lah ban wan rah ïa ka jingmynsaw ne ka jingjia ba sngewsih lada ki khyllem haba wan ka erïong ha kano kano ka por.
Haba kren sha ki lad pathai khubor, u Rangbah shnong ka Shnong Quinine Nongladew, u Bah B. Lyngdoh, u la ong ba kum ka shnong ka la shim khia ïa kane ka kam hadien ba la pynpaw jingma da ki paidbah nongshong shnong bad na ka liang ka bor shnong ka la dep ruh ban phah jingthoh sha ka tnad Forest ha Nongpoh ba kan wan ban jurip bad ban ot noh ïa kitei ki dieng kiba don jingma.
U la ong ruh kum ka shnong ka pynpaw ruh ïa ka jingsngewkhia ha kaba wat lada na ka liang ka shnong ka la dep ban ai da ka jingthoh sha ka tnad Forest, hynrei haduh mynta kam pat don kano kano ka jingshim khia ban wan jurip ne ban peit ban khmih ïa kitei ki diengbah kiba la buh jingma ïa ki paidbah nongshong shnong.
Halor kane ka jingma kaba ap da ka jingdon kitei ki diengbah hapoh katei ka shnong, u Bah B. Lyngdoh kum u Rangbah Shnong bad wat ki nongshong dukan ha katei ka shnong ki la kyrpad jur ïa ka tnad Forest ba kin shim khia ïa kane ka kam ban wan jurip na ka bynta ban pom noh ïa ki dieng kiba don jingma, namar kane ka aiom ban khie ka erïong lada ym lah ban pom ïa kitei ki dieng ka lah ban buh jingma ne ki jingjia ba sngewsih ïa ki paidbah nongshong shnong, ki la bynrap.
