Shillong, Nohprah 10: Ka Regional Council Demand Committee (RCDC) – kaba mihkhmat ïa ki rit paid jong ki jaitbynriew riewlum ba kynthup ïa ki Hajong, Koch, Rabha, Boro, bad Mann – ka la wad ka jingtuklar jong u Lat ka jylla Meghalaya u CH Vijayashankar na ka bynta ban thaw ïa ka Regional Council for minority tribal communities, da kaba kdew ïa ki kyndon jong ka riti synshar bad ki jingleh lyndet ïa ki khana pateng bad kiwei ki hok.
“Ngi dawa jur ïa ka jingdonkam ban thaw ïa ka Regional Council bad ngi kyrpad ïa phi ban shim khia lem ïa kane ka kam bad da ka jingsngew synei,” ong u Chairman ka RCDC bad u Myntri barim u Dr KC Boro u la ong ha ka dorkhas ba la aiti sha u Lat ka jylla ha ka sngi Balang.
Ka RCDC ka kyrpad ïa u Lat ban pyndonkam ïa ka bor ba la bynshet hapoh ka Articles 244(2) bad 275(1) jong ka riti synshar ban thaw ïa ka Regional Council, kaba dei ruh katkum ki kyndon hapoh ka Sixth Schedule ka riti synshar jong ka ri India bad kiwei kiwei ki jingeh ba mad da ki kynhun jaitbynriew.
“Ma ngi ki Minority Scheduled Tribes ka Meghalaya, ngi kwah ban im ha ka suk ka saiñ bad ka jingdon kyrdan kum kiwei pat ki kynhun jaitbynriew ha ka jylla,” u la ong.
“Ngi sngew ïa ka jingdonkam jong ka Regional Council, kaba dei ka jingkhmih lynti kaba khatduh jong ka jingkiew bad jingim jong ngi.”
Kane ka Regional Council ba la tyrwa ka don ka jingheh kaba malu mala 1,987 sq. km, da ka jingbun paid kaba 1,97,718 ki minority tribal.
Ïa kane ka dorkhas la soi lang ruh da ka Meghalaya Indigenous Minority Tribals’ Forum (MIMTF), kaba la pynpaw ïa ki jingshah leh lyndet ki khana pateng, ki jingshah ban beiñ, shah leh beiñ bad kiwei kiwei. Watla ki dei ki trai ri trai muluk ha ka jylla, kine ki kynhun ki ïaineh kiba sahdien ha ka pule puthi, ka ïoh ka kot bad ka saiñ pyrthei haba nujor ïa ki heh paid riewlum ka Meghalaya.
Ki nongmihkhmat ka council ki pynpaw ba ka bhah kam ka noh shibun sha ki Garo, Khasi, bad Jaiñtia, kiba ïoh 80% ka quota, ha kaba kiwei ki ïoh 5%.
Ka RCDC ka la kyntu ïa u Lat ka jylla ban pyrkhat lem ïa kane ka jingkyrpad bad ban shim ïa ka kam kaba kongsan ban pynbeit ïa kine ki jingeh kiba noh shilliang.
