Nongpoh, Naitung 23: Ka Ri Bhoi People’s Council (RBPC) kum kawei na ka seng kaba dang shu dep ban suit ban shor thymmai ha ka them Ri Bhoi ban ai ïa kata ka jingshakri na ka bynta ka bha ka miat bad ka roi ka par ki paidbah ha Ri Bhoi District, nalor shibun ki jingangnud bans hakri na ka bynta ban kyntiew ïa ka dong Ri Bhoi ka la shim ruh ïa ka rai ban ïa khun pyrshah ne ban pynduhjaid halro ka jingkynrei jong u drok kaba la buh jingma na ka bynta ka lawei jong ki khun samla kane ka District.
Kum ban pynkynmaw, ïa kane ka seng la suit la shor da ka kyrteng ba pura ka Ri Bhoi People’s Council (RBPC) ha ka 17 tarik u Naitung 2023 ha Nongpoh, kaba dei ruh ka lyngkhuh sngi ïap ba 188 snem u Syiem Tirot Sing, uba dei u khlawait ka jaid bynriew ba ïa khun pyrshah ïa ki Phareng bad uba la len lade ruh ïa ka jingim na ka bynta ka jinglaitluid ka jaid bynriew na ka jingsynshar donbor ki Phareng (British).
Haba kren ruh ha katei ka sngi kum u Convener kane ka seng bad u ban sa shimti ruh ïa ka lyngkor nongïalam kum u President ka RBPC, u Samla Jason Lennox Nongrum, ha katei ka sngi u la kren maitphang halor shibun ki jingthmu jong ka seng (issue) kiba dang sahteng ha Ri Bhoi bad nalor shibun ki mat kiba u la kren ban ïakhun pyrshah ïa u drok bad kiwei ki kam sniew ka dei ka mat kaba hakhmat eh ba kane seng kan sa shim khia ban ïa khun thma na ka bynta ban pynduhjaid ïa ka jingkhaïi beaiñ ïa u drok.
U la ong ruh ka seng ka shim khia ban phai khmat na ka bynta ban ïakhun thma pyrshah ïa u drok, ka dei namar ba kum ka seng ka la ïohi halor ki jingshah ktah jong kiba bun ki khun samla kiba la ngop ha u drok, ba u drok u pynjot ym tang ïa ki khun samla bad u ktah ruh ïa ka ïing ka sem bad wat ïa ka imlang ka sahlang kaba pyntroiñ ïa ki samla bad wat ïa ka jaid bynriew.
Haba kren halor kane ka jingangnud ka seng ban ïa khun pyrshah ïa u drok uba la bsuh khlieh ym tang ha ki jaka sorkar bad uba la ïoh lad ruh ban rung sha ki shnong nongkyndong, u Bah Jason Lennox Nongrum, u la ong ruh ba ka seng kan shim khia ban trei borbah na ka bynta ban khanglad ïa kane ka jingkhaïi beaiñ ïa u drok khnang ba ki khun samla kin lait na ka jingshah pynjot ha une u drok u ba long u nongshun jong ka imlang ka sahlang.
Shuh shuh, u la kren shai ruh ba ka seng kan sa shim khia ruh ban ïa kren sha ka sorkar jylla ba kan thaw ïa ki lad ki lynti na ka bynta ban ïa khun thma pyrshah ïa une u drok bad na ka liang ka seng ka la dawa ruh na ka sorkar ba ka dei ban buh noh da kita ki Rehabilitation Centre ha Ri Bhoi khnang ban ai ka jingshakri kaba kyrpang na ka bytna kito ki samla kiba la ngop ha u drok bad ruh ban dang lah ban ïalap pyrshah ïa u drok ba kum ki khun samla da lei lei kim dei ban ktah ïa u drok uba long u nongshun jong ki samla bad ka imlang ka sahlang, u la bynrap.
