Dawa ka NPP ïa u CM barim ka Manipur ban panmab halor ka jingkynnoh ïa u (L) PA Sangma

Shillong, Ïaïong 01: U Working President ka National People’s Party (NPP) In-Charge Garo Hills u Marcuise N Marak u ba dei ruh u Myntri Sorkar u la dawa na u Myntri Rangbah barim ka Jylla u N Biren Singh ba udei ban panmap halor ka jingkynnoh ba u PA Sangma, bam Kwai Dwar u Blei, u kwah ban phiah ïa ki Jylla hapoh ka thaiñ Shathei Lammihngi (North East).
Haba pynrem ïa ki jingkynthoh, u Marcuise u la ong, “U N Biren Singh u dei uba la thaw ïa ki jingkulmar hapoh ka Jylla Manipur bad baroh ki tip ïa kata hynrei mynta u tan kylla ïa ka kyrteng jong u PA Sangma watla um don shuh bad ngi ha kane ka sla pyrthei”.
“Kane ka long kaei kaei ka bym lah ban pdiang bad ngi pynrem jur ïa kane ka jingkynnoh bad ngi dawa ba u N Biren Singh u dei ban panmap mardor,” la ong u Marcuise.
U Marcuise u la ong ba u PA Sangma bam Kwai Dwar u Blei, u dei u nongïalam ba janai bad u nongïalam ba trei na ka bynta ka bha ka miat ki paidbah khamtam ka thaiñ Shathei Lammihngi (North East).
U la ong ba u PA Sangma bam Kwai Dwar u Blei, u don ha ka nongrim ba skhem kata ban pynïatylli ïa ki paidbah, ym ban pynïapait kumba la kynnoh da u N Biren Singh.
“Namar kata nga pynrem jur ïa ka jingkren u N Biren Singh bad na ka liang ka NPP Garo Hills nga dawa ba udei ban panmap mardor,” u la bynrap.