Shillong, March 28: Ka North-Eastern Hill University Teachers’ Association (NEHUTA) kala dawa ïa ka Prof S.M Sungoh bad Prof Fameline K Marak ba kin iehnoh ïa ka kam kum ki Pro Vice-Chancellor ka NEHU, Shillong bad Tura Campus.
Kane ka synjuk ki Nonghikai kala kam ba ka jingthungkam ïa ki ka long kaba be-aiñ bad kaba long pyrshah ïa ka aiñ jong ka NEHU bad ki kyndon ka Sorkar.
Ha ka shithi bala phah sha baroh ar ngut ki Pro VC ha ka sngi Thohdieng, ka NEHUTA ka la ong ba ka la kyntait mardor ïa kane ka jingthung kam ïa ki ha u bnai Nohprah 2024 ba la leh da u Prof PS Shukla, Vice Chancellor ka NEHU, namar ka jingkynnoh ba la pynkheiñ ïa ki rukom treikam kumba la buh hapoh ka NEHU Statute 3 bad ka rai jong ka Executive Council, kaba la ïakren ïa ka jingthungkam ïa ki Pro VC, ka bym shym la don satia ïa ka quorum.
Kala ong ruh ba u Prof Shukla bad Registrar Col. Omkar Singh (Retd) ki dang don ha shuti ha ka por ba thungkam ïa ki, bad pynskhem ba ki kam ba la leh da kine ki Heh Ophisar ha ka por ba kim don ha ka Ophis treikam jong ka NEHU, ki long ki bym don nongrim kumba la pynbna da u Acting Vice-Chancellor barim Prof N. Saha.
“Ka NEHUTA ka la kyntait mardor ïa kine ki jingthungkam bala leh ha u bnai Nohprah 2024 bad naduh katei ka por ym shym la don kano kano ka jingkylla bad ngi kyntait mardor ïa ka mynta ruh kumjuh,” ong u president ka NEHUTA Prof. Lakhon Kma ha ka shithi.
Ka Association kala kdew ba u Prof. Shukla u la jah na ka Shillong Campus naduh ka 15 tarik u Nohprah, 2024, bad u dang jah haduh mynta, kaba long haduh 133 sngi lynter. Ka la ong ruh ba ka Ministry of Education ka Sorkar India kam pat pynmih paidbah satia ïa ka kaiphod jong ka Inquiry Committee halor ka jingleh jong u Prof. Shula bad kumta um pat lait satia na ki jingkynnoh kiba jur pyrshah ïa u.
“Kaba kham sngewkhia ka long ba katba baroh ki kynhun ki la pyrshah ïa ka jingbteng jong u Shukla ha ka kam VC, bad kumjuh ruh u MP ka Meghalaya u Dr. Ricky AJ Syngkon ula kren ïa ka kam ban weng ïa u VC hapoh Parliament, phi la kyrshan ïa u Shukla bad pynshong aiñ ïa ki kam beaiñ jong u, pynkheiñ ïa ka NEHU Act & Statutes, ka Rule ka Sorkar India bad ka jinglong pyrshah riewlum bad pyrshah ïa ki nong Meghalaya kaba ula pyni ha ka por jong u” ong u Prof Kma.
Ka NEHUTA ka la kdew shuh shuh ba ka kyndon jong ka Ministry of Education kala pyrkhing ban thung ïa ki briew shimet ha ki kam ba la buh da ka aiñ hapoh lai bnai hadien ba ki la shongthait, ka rule kaba ki kam ba la treikam ïa ka Prof Sungoh, kaba dei ban shongthait noh ha ka 31 tarik Jymmang 2025.
Halor kine kiei kiei, ka NEHUTA ka kyntu ïa ka Prof Sungoh bad Marak ba kin iehnoh mardor naka shuki Proc VC bad ong ba ka Association kan sa shim rai ïa ki sienjam ban pynbud kaba shong kat kum ka kam ba ki leh.
