Shillong, Iaiong 1 : Ka North Eastern Hill University Teachers’ Association (NEHUTA) ka dawa ba ka Prof S.M Sungoh bad ka Prof F.K Marak ki dei ban hiar mar mar na ki shuki kum ki Pro Vice Chancellors (PVC) ka Shillong bad Tura Campus.
ïa kane ka rai la shim ha ka General Body Meeting jongka NEHUTA hadien ba ym don Vice Chancellor shuh ban peit bad pynïaid ïa ka NEHU mynta la bun bun bnai. Ka jingïalang ka rai ba ka jingthung Pro VC ka long tang da ka jingpynbna ba la pynmih da u Assistant Registrar Planning ha ka 13 tarik Naiwieng 2024 bad kumjuh ruh da u Omkar Singh ha ka 14 tarik Naiwieng 2024 ïa kaba ym lah ban pdiang satia da lei lei ruh namar ka Executive Council kaba dei ban thung ïa ki Pro VC kam don Quorum satia.
Nalor kata u VC u bym don ha ka ophis treikam ka NEHU um shym la bud kat kum ki kyndon treikam jongka NEHU Statute 3. Ha ka jingthung kam u la pynpaw ïa ka Statute 3 ïa kaba u khlem burom bad bud beit bud ryntih pat da lade kumta kane ka jingleh ka long ka bym ïahap satia.Nalor kata ka shithi u Omkar Singh uba la shim shuti naduh ka 3 tarik Naiwieng bad ym pat join ha ka kam haduh mynta ka la long kaba la iap lypa.
Ka NEHUTA ka pynrem jur ïa kane ka rukom thung Pro VC bad kumjuh ruh ïa ka jingshimti jongka Prof S.M Sungoh bd Prof F.K Maram ïa ki shuki namar ka dei ka jingleh beaiñ jong u Prof Shukla. Kumta ka NEHUTA kam pdiang ïa kane da lei lei ruh bad ka kyntu jur ïa kine ki arngut ki Pro VC ban iehnoh ïa ki shuki jongki.
