Khliehriat Iaiong 8: Ka seng Meghalaya People;s United Front- East Jaintia Hills District, kala dawa ia u District transport Officer (DTO) ka District Bah T Lamin ban wanrah ia ki Motor Vehicle Inspector (MVI) hapoh ka Ophis jong ka District ka ban pynsuk ia ki paidbah ha kiba bun ki jingdonkam.
Ka seng hapoh ka jing ialam jong u bah Kyrshan Blah, lem bad ki dkhot mynta ka sngi ki la leit ban ïakynduh ïa u District Transport Officer jong ka East Jaintia Hills District, u bah T.Lamin bad ki la iakren bad u halor ka jing bym don MVI shuh mynta la bun bnai ha katei ka ophis.
La ong ba na ka liang u DTO East Jaiñtia Hills, u la ong ba na ka liang jong ka ophis jong u ka la dep phah ïa ka jingthoh sha ki bor ba ha lor bad pyntip ba ym don MVI ha katei ka ophis.
Halor kane ka seng ka buh ka jingkyrpad bad kyntu ïa u Commissioner jong ka tnat Transport ba un sngew bha ban shim khia lem halor kane ka kam bad ka seng kan nym shong kli kti bad kan sa leit ban buh da ka jingthoh ha khmat u Commissioner jong ka tnat Transport.
Ka jingbym don jong ki Motor Vehicle Inspector (MVI) hapoh ka District ka la wanrah ia ka jingdkoh treikam jong kane ka Ophis Sorkar kaba dei ban peit ia ki kam kali, ban pynbiang ia ki kot ki sla jong ki kali, bad kiwei kiwei.
