Dawa ka MPUF-EJHD ban buh pulit pynïaid kali ha ki skul kiba don hajan ka surok NH

Khliehriat, Nailar 29: Ki dkhot jong ka Meghalaya People’s United Front East Jaiñtia Hills District kaba hapoh ka jingïalam u President u bah Kyrshan Blah mynta ka sngi ki la leit ban kynduh ïa u Sperintendent of Police ka East Jaiñtia Hills District bad ki la buh ruh da ka jingthoh ha kaba ki la dawa na ka tnat pulit ban sngewbha ban buh pulit pynïaid kali ha jan kito ki skul kiba don ha rud ka surok bah national highway, kum hajan ka skul Khliehriat Higher Secondary School bad kiwei kiwei ki skul ba don ha rud surok khnang ba kan kham pynsuk ïa ki khynnah ban jam na shiliang sha shiliang ka surok bad ba kan nym wanrah kano kano ka jingjia ba sngewsih.
Ka seng ka dawa na ka tnat pulit ba pynïaid kali ban buh pulit ha ka por shwa ban sdang skul kata ha ka por 8 baje mynstep bad ha ka por ba wai skul ki khynnah ha ka por 3 baje jan miet.
Ha kaba ïakren bad ki dkhot ka seng u Superintendent of Police East Jaiñtia Hills District, u Jagpal Singh Dhanoa, IPS u la kular ba un shim khia ïa ka jingdawa ka seng bad ba un phah noh ïa ki pulit pynïaid kali ba kin sdang naduh lashai ka sngi ban pynïaid ïa ki kali ha kito ki skul kiba don hajan ka surok bah.
U President ka MUPF East Jaiñtia Hills District, u bah Kyrshan Blah, u ai ka jingkhublei ïa u Superintenddent uba la kloi ban pdiang ïa ka jingdawa ka seng ka ba long na ka bynta ban ïada ïa ki khynnah skul ban lait na ki jingma jingmynsaw ha ka por ba ki jam na shiliang sha shiliang ka surok.