Shillong, Nohprah, 06: Ka Maitshaphrang ha ka sngi Baar ka la dawa ïa ka Sorkar Jylla ban pynbna ïa ka 6 tarik u Nohprah, kaba dei ka sngi ïap jong ka Phan Nonglait kum ka sngi Shuti ha ka jylla baroh kawei.
Kumba ka long mynta, dei tang ka Eastern West Khasi Hills District kaba la pynbna shuti mynta ka sngi Baar ban rakhe ïa ka lyngkhuh sngi ïap jong ka Phan Nonglait.
U Convenor jong ka Maitshaphrang u Bah Michael Syiem ha ka jingïakren bad ki lad pathai khubor u la ong, ka Phan Nonglait ka dei ka riewshlur kaba la don bynta ha ka jingïaleh laitluid jong ka ri India kum ka kynthei ba nyngkong eh ban synran ïa u Syiem Tirot Sing bad ïa ki shipai jong u ban pynïap klep ïa ki shipai ka Sorkar Phareng.
“U synñiang u bynhei jong ka Phan Nonglait ha ka jingïaleh laitluid, kam ïapher na ka Rani Lakshmibai jong ka Jhansi ha u snem 1857. Nalor ba ka long ka riewshlur ban ïadon bynta lang ha ka Anglo-Khasi War, ka la long ka atiar ba ki shipai u Tirot Sing ki la ïoh ban pynïap ïa ki 32 ngut ki shipai Phareng,” ong u Bah Syiem.
U la ong, ha ka jingkynmaw burom ïa ka lyngkhuh sngi ïap kaba 172 snem jong ka Phang Nonglait, ka Maitshaphrang ka kyntu ïa ka Sorkar Pdeng bad ka Sorkar Meghalaya ban ai ka jingithuh bad ïa kane ka riewshlur bad ban rakhe ïa ka 6 tarik u Nohprah kum ka sngi kynmaw burom ïa ka Phan Nonglait khnang ban dup pynpaw pyrthei ïa u synñiang bad ka jinglen lade da kaba ai khusnam ha ka kyrteng jong ka.
U Bah Syiem u la ïathuh ruh ba ka Maitshaphrang ka la pynlong teng ïa ka drama ba la ai kyrteng, “ka drama ka Phan Nonglait, ha kiba bun ki shnong ha Shillong bad ha Nongkhlaw ha ki snem 1994 bad 1995. La pynmih ruh da ka kot lyngkdop halor kane ka drama bad ïa ka jingkynthoh la ai da u Vice Chancellor barim jong ka NEHU u Dr. Barister Pakem.
Dang shen ha ka 29 tarik, Ïaiong, 2022 u samla Daniel Stone Lyngdoh Nonglait u la pynmih pyrthei ïa ka kot kaba u la ai kyrteng, “Ka Phan Nonglait-A Lady Freedom Fighter of India,” hadien ka jingwad bniah kaba la shimpor haduh 19 snem kynthih.
