Dawa ka kynhun ki khynnah ba hapoh 18 snem ban shna ki jaka sumar ei ïa ki khynnah ba la ngop ha u Drug

Shillong, Rymphang 21: Ka kynhun jong ki khynnah rit kiba don hapdeng ka 8 snem ka rta haduh 18 snem kiba don hapoh ka shatri kaba la tip kum ka Child Parliament, kila kyrpad ïa ka sorkar bad ruh ïa ki Dorbar Shnong ba kin shna da ki rehap centre ne ka jaka sumar ba khlem jingsiew pisa na ka bynta ban ïoh pyllait im ïa ki para khynnah kiba ngop bad kyrni ha u drug.
Ïa kane ka kynhun Child Parliament la peit bad khmih da ki Missionery Sisters of Mary Help of Christian (MSMHC) kaba la ioh ka jingithuh na ka sorkar jylla ha ka 15 tarik u bnai Risaw 2005 hapoh ka shatri North Eastern Regional Domestic Workers Welfare Trust (NERDWWT) bad kumjuh ruh na ka National Domestic Workers Movement (NDWM).
Haba kren bad ki lad pathi khubor u Emanuel Nongneng uba dei na ka Child Parliament na Nongrah u la ong na ka jingdon une u jingdih ba sniew kum u drug kila don shibun ki long ïing long sem kila jot bad pra.
“Nga kyrpad ïa ka sorkar jylla bad kumjuh ruh ïa ki Dorbar Shnong ba kin shna noh da ki rehap centre ne ki jaka ai jingsumar ei, khnang ban ïoh pyllait ïim ia ki khynnah kiba ngop ha u drug” u la ong.
Shuh shuh u Heprit Emanuel u la ong, ym dei tang kiba la rangbah kiba la ngop ha u drug, hynrei kiba bun ki heprit kiba la ngop bad kyrni ïa u bad kaba mih pat ka jingshah shoh shah dat bad kum kine ki khynnah kim smat shuh banleit sha ki skul bad ruh ki kylla noh ka jinglong jong ki bad poi shaduh u pud ba kin hap thiah sha ki surok.
“Shisien ba la ngop ha u drug, shibun tylli ki long ïing ki jot ki pra bad ka mih pat ka jinghuri hura ïing ki jot ki pra bad ka mih pat ka jinghuri hura ïa kito ki long ïing kaba lam pat ïa ki sha ka jingduk”, u la ong bad bynrap ruh”Hangne ha nongbah Shillong ki don tang ki jaka sumar kiba heh bad kiba remdor, kumta la donkam ka jaka ai jingsumar ei ïa ki khynnah kiba la ngop namar ba ka jingsumar kadei ka jingpyllait im”.
Shuh shuh sa kiwei ki heprit kila dawa ba dei ban kem ïa kito ki briew kiba die sikret, kyiad bad drug ïa ki khynnah rit bad kamlong kaba bha ban shi ieh bein ïa ki khynnah kiba ngop ha ki jingdih ba sniew.
Kine ki khynnah kila kyrpad ruh ïa ki bor ba dei khmih ba kin peit bad sngap lem ïa kane ka jingdawa jong ki Child Parliament.
Haba ai ka khubor sha ki kmie ki kpa, kine ki khot jong ka Child Parliament kila ong ba ka jingieit na ki kmie ki kpa kadei ka dawai bah bad ka dawai kaba bha tam eh.
Haba kyrpad ïa ki pulit, kila pynpaw ba haba ki ioh bat ïa ki khynnah kiba langop ha u drug ne kiwei pat ki jingdih ba sniew kim dei ban niew ïa ki kum kita kiba la kyrni hynrei niew ïa kum ki khynnah ym kum ki runar bad bynrap ruh ym dei ban ieh noh bein ïa la ki khun ki kti.
Kane ka kynhun ne ka Child Parliament kala don haduh 500 ngut ki khynnah bad kiba dei ki khynnah ki dei ki khun jong ki nongbylla ïing briew bad kiba bylla sngi, hynrei ki don ruh ki khun jong ki ophisar ruh.
Na ka liang ka Daleena Francis kaba dei ka State coordinator jong ka National Domestic Workers Movement kala ong ba la seng ïa ka ban trei na ka bynta ki khun jong kiba trei bylla ha ki ïing briew hapoh ka Child Right Movement (CRM).Ka CRM la thaw ha ki 18 tylli ki jylla jong ka ri India da ka jinghmu ban pyntikna ba ki khynnah kim dei ban shah ban bein ne shah leh bein bad kiwei kiwei.