Shillong, Rymphang 3 : Ka Dorbar Kur Nongkhlaw kaba la long mynta ka sngi 3tarik Rymphang 2025 ha Umphyrnai ha ka ba da ki spah ngut ki parakur parajait Nongkhlaw ki la poi sha ka Dorbar. Ha kane ka Dorbar Kur la wan pynshngaiñ da ki rangbahkur na ka Synjuk Ki rangbahkur: Ka Bri U Hynñiewtrep ban kyntu kynpham ïa ki parakur parakha na ka bynta ban pynneh pynsah ïa ka riti kheiñkur kheiñkha na ka kmie. Ki rangbahkur ba la kren ha kane ka sngi ki long u Bah R L Kharpran, Khlieh Rangbah, Bah Erwin K Syiem Sutnga, u Sangot bad u Bah Raphael Warjri, u dkhot ka Synjuk Ki Rangbah Kur, nalor ki rangbahkur Nongkhlaw ba kynthup ïa u Khliehrangbah, S Nongkhlaw, u Nongkynpham bad Myntri Hima Mylliem, Bah Iaineh Nongkhlaw bad u Khlieh rangbah ba dang jied thymmai ha kane ka sngi Bah Pynshai Nongkhlaw bad u Sordar Umphyrnai, Bah L Kharkongor. Ha ka ba pynthymmai nongkitkam la pynneh kumjuh ïa baroh lait noh tang ïa u Khlieh Rangbah da ka ba bud ryntih ïa ka riti synshar ha ka nongrim ban aiti lang ïa ka jingkitkhlieh ha kiwei kiwei ki rangbahkur Nongkhlaw ki ban kit ïa ka lyngkor.
U Bah Erwin K Syiem Sutnga u la kren mardor halor ka ba shah ïuhroit jong ka kur Nongkhlaw ha ki phareng shwa ban ïoh ka jinglaitluid ka Ri India. U la kdew ba ka lynti jong ka aiñ ka dang don na ka bynta ban pynim biang ïa ki jingdawa jong ka kur Nongkhlaw katkum ki dulir ba naduh u snem 1863. halor kane ka bynta u Myntri Iaineh Nongkhlaw ruh u la kubur bad ban jur ban dawa ia ka hok jong ka kur Nongkhlaw na ka Sorkar kmie bad sortkar jylla. U bah Raphael Warjri u la kren shaphang ka thymmei jong ka longkur longkha katkum ki riti dustur tynrai ha ka ba u la ïathuh ba la don ka kot ba la thoh sani ha kane ka liang. U bah R L Kharpran pat u la kdew ïa ki jingma ki ba ïai mih manla ka khep ha ka imlang sahlang da ki briew ba khwan myntoi na ka ba ïoh ban aijait Khasi.
Ha ka kylla sngi pat kiwei kiwei ki rangbah na ka kur Nongkhlaw ki la kren ki tien sneng tien kraw ïa la ki para ki pyrsa ha ryngkat ka ba maham ruh ban ym bakla da ka ba tynneng rongphong ïa ka dustur khyllah jong ki dkhar lyngkien ne ki mynder na satlak pyrthei. Kum shibynta jong ka Dorbar pyllun jong ka kur Nongkhlaw ki la don ruh ki rong ki taw ka rwai ka put ka tem, ka shad ka kmeh shisien shisnem ban pynsngewbha ïa ki khynnah bad samla jong ka kur Nongkhlaw. La pynïaid ïa ka Dorbar Kur da u Bah Jeronimus Nongkhlaw, rangbahkur.
