Dawa ka KSU na u Myntri Rangbah ban pyntreikam noh ïa ka Meghalaya House ha Bengaluru

Shillong, Naiwieng 10: Ka Khasi Student Union (KSU) Bengaluru Unit ka la phah da ka dorkhas sha u Myntri Rangbah ka Jylla u Conrad K Sangma ba kyntu ban pyntreikam noh ïa ka Meghalaya House ha Bengaluru bad ban pynïasoh liengsuiñ na Nongbah Shillong sha Bengaluru.
Ha kane ka dorkhas, u president ka KSU-BU u samla Donboklang Nongphud u la ong, “Ngi pynpaw ka jingsngewnguh kaba khraw ïa ka Sorkar Meghalaya kaba la ïoh ïa ka Building ban pyntreikam kum ka Meghalaya House ha Bengaluru hynrei haduh mynta ym pat plie bad ym pat pyntreikam ïa ka. Ngi kyntu ïa ka Sorkar ban pyntreikam noh khnang ba ka Meghalaya House kan long kum ka jaka ai jingïarap kaba kongsan bad ka jaka sah na ka bynta ki samla pule, ki nongpang, bad kiwei kiwei ki nongshong shnong na ka Jylla Meghalaya”.
Na ka liang ka KSU ka kyrpad ruh ïa ka Sorkar ban pyntreikam da ki liengsuiñ kiba her na Shillong sha Bengaluru la kumno kumno shisien shi taïew ban ïarap ïa ka leit ka wan ki nongshong shnong ka Meghalaya.
Nalor kata, ka KSU ka la pan jingïarap na ka Sorkar ban ïarap kit lem ïa ki nongshong shnong kiba la khlad noh da ka jingkyrshan pisa bad la thung ïa ki ophisar na Meghalaya Secretariat ban peit ïa ka bha ka miat jong ki nongshong shnong jong ka Meghalaya ha Bengaluru.