Dawa ka KSU ïa ka Sorkar Pdeng ban kynthup ïa ki ST ha ka jingïoh jinghikai ei ban pynkhreh IAS

Shillong, Nohprah, 11: Ka Khasi Students Union lyngba ka Education Cell ka la pynher ïa ka shithi sha u Myntri khynnah ka sorkar pdeng uba peit ïa ka Ministry ka Social Justice & Empowerment u A. Narayanswamy ban kyrpad na u ban kynthup lang ïa ki riewlum ne Scheduled Tribe (ST) ka jylla khamtam ïa ki Khasi ha ka thup jingïoh jingmyntoi ba la ai kyrpang ïa ki Scheduled Caste ha ka jingai jinghikai ei ha ka Dr. Ambedkar Centre of Excellence ( DACE), NEHU na bynta ka jingpynkhreh ban ïakhun ïa ka eksamin ba pyllong da ka Union Public Service Commission (UPSC) ban long IAS, IPS bad kiwei ki ophisar heh kyrdan.
Ha ka shithi ka KSU ka la buh jingkyrpad ïa u Myntri ka long hadien ba ka Ministry ka buh kyrpang ïa kane ka jaka ai jinghikai tang na bynta ki Scheduled Caste bad kyntu ba un peit lem ba ki Khasi kin ïoh jingmyntoi lang na kane ka jaka ai jinghikai ei ïa ki samla pule ka NEHU ba kin pynkhreh ïa ki eksamin UPSC.
“Na ka liang ka seng ha ka 25 Jymmang 2022, ka la ïa kynduh bad u Vice Chancellor ka NEHU ban buh ka jingkyrpad lyngba jong u ba ka Ministry bad ka Foundation kan ai jingbit ïa ki riewlum ban ïoh jingmyntoi na ka DACE hapoh NEHU, namar kumba long mynta ki samla pule ka jylla kiba kwah ïakhun ïa ki Civil Services Examination ba pyllong da ka UPSC kim don kino kino ki lad leit shah hikai namar duna palat ki coaching center bad naduh u snem 2013 ngim lah shuh ban pynmih IAS/ IPS wat tang uwei na ki riewlum ka jylla,” ong ka KSU.
“Nangta shuh shuh ha ka 12 Nailur 2022 u Nodal officer ka DACE-NEHU u la phah jingthoh sha u Director ka Dr. Ambedkar International Centre, Ministry of Social Justice and Empowerment, u Dr. Vikas Trivedi, ban kyrpad ïa u ban ai jingbit ba ki riewlum bad ki OBC kin shah hikai lang ha kane ka shlem ai jinghikai hynrei haduh mynta ym pat shym la ïoh jingbit satia,” bynrap ka shithi ka KSU.
Ha ka shiti ka KSU ka la kdew ha u Myntri ba watla ka sorkar ka la pynkha kyrpang da kawei pat ka tnat ba peit tang ïa ki riewlum ka Ministry of Tribal Affairs ha u Risaw 1999, hynrei ka KSU ka buh jingkyrpad khnang ba un kynthup lang ïa ki samla riewlum ka jylla kiba pule ha NEHU kin ïoh jingshah hikai ei na ka Ministry ka Social Justice & Empowerment lyngba ka DACE ban pynkhreh ïa ka eksamin UPSC.
Ba kdew hangne ba ha ka 22 Ïaiong 2022 ka Dr. Ambedkar Foundation (DAF), jong ka Ministry of Social Justice & Empowerment, Govt. of India, ka la sdang ïa ka Dr. Ambedkar Centres of Excellence (DACE) ha ki 31 tylli ki skulbah ka sorkar pdeng na bynta ban ai jinghikai ei kaba paka ïa ki samla pule ba dei na ka thup Scheduled Caste ba kin ïakhun ïa ki eksamin Civil Services ba pyllong da ka Union Public Service Commission (UPSC) bad dei ha ka 23 tarik Jymmang 2022 ka NEHU ka la ïasoi ïa ka soskular bad ka DAF na bynta ban sdang noh ïa kane ka DACE ha NEHU.