Dawa ka KSU ïa ka sorkar MDA ban wanrah biang sa ka Resolution kaba Ar halor ka ILP

Shillong, Kyllalyngkot 24 : Ka Khasi Student Union (KSU) ka dawa na ka sorkar MDA hapoh ka jingïalam jong u Myntri Rangbah ka jylla u Conrad K Sangma ban wanrah biang sa shisien da ka Resolution hapoh ka ïing Dorbar Thawaiñ ka jylla ban pynbor biang ïa ka sorkar pdeng ban pyntreikam ïa ka Inner Line Permit (ILP) ha Meghalaya.
ïa kane ka rai la shim ha ka General Executive Council (GEC) jongka KSU kaba la long mynta ka Sngi Saitjaiñ ha NEHU.
Haba kren sha ki lad pathai khubor hadien ka jingïalang u President ka KSU u bah Lambokstar Marngar u la pynpaw ka jingsngewdiaw kaba jur halor ka jingbym don ki aiñ kiba khlaiñ ban ïada ïa ka jingwan tuid ki bar jylla bad ki mynder sha kane ka jylla. “ Ngi la ïatai sani bha halor ka jingïada bad jingshngaiñ jongka jaidbynriew hynrei ngi sngewsih ba ym don ki aiñ kiba khlaiñ ban ïada ïa ngi ki jaidbynriew trai ri trai muluk na ka jingwan tuid ki bar jylla bad ki mynder sha kane ka jylla”.
U la ong ba ka sorkar ka la plie ïaka Khyrdop Entry bad Exit ha Umling, Ri Bhoi kat kum ka Meghalaya Resident Safety and Security Act hynrei ka la khang noh mynta.
Halor ka jingpynslem jongka sorkar pdeng ban pyntreikam ïa ka ILP u bah Lambokstar u la ong “ Ngin ïeng skhem beit ha ka nongrim ba ka sorkar pdeng ka dei ban pyntreikam ia ka ILP ha ka jylla kumba ki 60 ngut ki MLA ruh ki la mynjur lang ïa ka Resolution ba la wanrah hapoh ka ïing Dorbar Thawaiñ ka jylla. Kumta lada ka sorkar pdeng ka dang pynslem ka sorkar jylla ka dei ban wanrah biang sa kawei ka Resolution ban dawa pyntreikam ïa ka ILP hapoh ka jylla”.
Halor ka jingtyrwa ban tyngkhap ïa ka kyndon kum ka ILP ha ka aiñ Immigration and Foreigners Act u bah Lambokstar ul a ong “ Lada ïa ka ILP lah ban pyntreikam ha kiwei ki jylla kane ka thaiñ balei hap ban pyntreikam da kawei ka aiñ ba ïasyriem ïa ka ILP hangne ha Meghalaya?
Kumta u ong ka KSU ka dawa beit ïa ka ILP namar lada ka sorkar pdeng ka pyntreikam ïa ka ILP ha kiwei ki jylla kane ka thaiñ balei ym lah ha Meghalaya ruh.
Halor ka jingkren jong u Myntri Rangbah pat u bah Lambokstar u ong “ Ngi donkam ban ïoh jingpynshai bha halor ki jingtyrwa jong u Myntri Rangbah namar ngim lah ban shu kynthoh khlem da tip bniah kiei kita ki jingtyrwa ne jingai jingmut.
U la iathuh ruh ba ka CEC kan sa ïakynduh shen ban ïakren bad shimrai yn leh kumno nangne shakhmat namar ka seng kan ban jur ïa ka sorkar ban wanrah da ki aiñ kiba khlaiñ ban ïada ïa ki jaidbynriew trai ri trai muluk na ka jingwan tuid kyrthep jong ki bar jylla bad mynder sha ane ka jylla. “ Ngi la ïoh ka jingmynjur na baroh ki dkhot bad ka CEC kan sa ïa kynduh shen ban shim rai aiu kan leh halor ki mat jingdawa kiba dang sahteng.
Ha kaba ïadei bad ka jingtih dewiong bad ka jingwan tuid ki bar jylla bad mynder, u bah Lambok u la ong “ Ngi phai khmat sha ka MRSSA bad kiwei ki aiñ ki ban pyrkhing ïa ka jingïoh wan rung suk ki bar jylla bad mynder sha ka jylla. Ka jingtih dewiong ka long da kawei pat ka mat. Ka sorkar ka khlem lah ban pyntreikam bha ïa ka MRSSA hynrei ka wanrah pynban da ka jingpynkylla kaba kynrum kynram bad ktah jur pynban.