Dawa ka KSU ïa ka sorkar ban phah bor pahara ban iada ïa ki paid Khasi Pnar ha Lapangap

Shillong, Nailur 27 : Ka Khasi Students Union (KSU) ha ka sngi Balang, ka la dawa ïa ka Sorkar Jylla ba kan phah bun ïa ki Pulit ban ai jingïada ïa ki paidbah khamtam ki nongrep Khasi-Pnar ka shnong Lapangap, West Jaintia Hills namar ka jing ïai bteng ka jinghiar thma jong ki paid Karbi na Assam.
Ha ka kyrwoh, u General Secretary ka KSU Donald V Thabah ula ong “Ngi kyntu ïa ka Sorkar Meghalaya ba kan pynkhlaiñ ïa ki bor ai jingïada ïa ki paidbah khamtam ïa ki nongrep ha kum kane ka por kheit mar rep”.
Kane ka la mih tang shisngi hadien ba ki paid Karbi ki la hiar thma ïa ki nongrep Khasi-Pnar da ki jri siat sim bad ki khnam ki ryntieh katba ki dang treikam hala ki jong ki pynthor.
U samla Donald u pyntip ba ki dkhot ka KSU West Jaintia Hills ki la hiar kyrkieh sha Lapangap ban ai ka jingkyrshan ba pura ïa ki paid Khasi-Pnar ka thaiñ.
Ula ong ba naduh kulong kumah, ka dei ka rukom jong ki Khasi-Pnar ban rep ban riang sha ki jaka ba don shabar ka Shnong. Hynrei, ki paid Karbi kila shim kabu ïa kane da kaba kam ba ki lyngkha rep jong ki Khasi-Pnar ki hap sha u pud ka Assam. Ula ong ba kum kine ki jingjia ki la jia beit tang ha ka por ot kba.
“Namar kata, ngin ai ka jingkyrshan ba pura ïa ki paid Khasi-Pnar ka Lapangap bad kiwei ki shnong kiba don ha khappud ka Assam. Ngin pynthikna ba wat tang shi inchi ka jaka jong ngi kan ym leit sha Assam” ula kular.
Une u Nongialam ka KSU ula kyntu ïa ki paid Karbi bad ki bor peit ka Sorkar Assam ba kin kiar na ka jingpyndik ïa ki paid nongrep Khasi-Pnar. “Ka KSU kam kwah ban mih ka jingïakajia hapdeng ki ar jaidbynriew hynrei kam lah ruh ban shu long ka nongpeitkai ïa ki kam thombor ïa ki briew lajong na ka por sha ka por” ula ong.
“ Ka Lapangap, Mukroh, Khanduli, Langpih, Sabuda, Umwang, Moolber, Moojem, Psiar, Khatkasla bad kiwei ki Shnong Khasi ki dang hap hapoh u pud u sam la Meghalaya bad ka KAAC lem bad ka Sorkar Assam kim lah ban shu kam trai ïa ki” ong une u Nongïalam ka KSU.